Daw Aung San Suu Kyi Kalay A Phan; Chief Minister Salai Lian Luai Nih A Don
TCP-Hakha| 2019 January 20| Myanmar rampi ruahnak petu Daw Aung San Suu Kyi vanlawng in Kalay a phan cang. Chin ramkulh Chief Minister Salai Lian Luai nih a don i atu hi helicopter in Chinram ah an zuang than cang tiah kan theih.
Daw Aung San Suu Kyi cu Naypyidaw in vanlawng in a rak zuang i January 20, suimilam 10:00am hrawng ah Kalay a phan. Chin ramkulh Chief Minister Salai Lian Luai, Sagaing ramthen Chief Minister le tuanvo ngeitu upa hna nih an don. Kalay vanlawng dinhhmun ah tlawmpal aa dinhtak hnu ah helicopter in Chinram ah an zuang than.
Tedim, Rih lei in an zuang i Thantlang peng, Tikir khua ah Tikir Dam le Electric Mei hunnak a tuah lai. Cu khawh in Thantlang ah a rak kir than lai i mizapi he ton biaruahnak an ngeih lai. Thantlang mizapi zong nih khua thanchonak thil phunthum hal an timh. Thantlang in Hakha ah a rak lan lai i Carson Hall ah mizapi he ton biaruahnak a ngei than lai. Hakha khuami nih thil phun 6 hal an timh tiah kan theih.
January 20 zan Hakha ah a riak lai i January 21 zingka ah Hakha khuacuanhnak Parthlam (Tower) le Lai Kutka (Lawng) hunnak a tuah lai. Hakha college le sianginn dangdang a zoh dih hnu ah Falam Surbung tlang vanlawng tual sak liomi a zohfel lai. Cu khawh in Tonzang peng, Tuikhinzang (Hakhalay) khua ah Daw Khin Kyi Foundation nih miharsa inn 46 a sakpiakmi a zohfel lai. Cun, Kalay ah a rak kir than lai i Kalay Town Hall ah mizapi he ton biaruahnak a ngei than lai tiah Chin cozah upa pakhat sin in kan theih.
Photo: Thant Sin facebook
About The Author
