Daw Aung San Suu Kyi Nih Pu Hrang Kaar Roca A Kuatmi An Pekchanh Cang
Salai Elvis| 2018 June 20| Thantlang peng Bungtlang khuami Pu Hrang Kaar (kum 86) cu Daw Aung San Suu Kyi nih roca, le hngiat-taih dur 5 a kuatmi cu June 19 ah tuanvo ngeitu hna nih Bungtlang khua ah pekchanhnak an ngeih tiah theih a si.
Pu Hrang Kaar nih Aung San milem lu cuangmi tangka fangkhat ca tlap 100 packing in a funmi cu a fanu Daw Aung San Suu Kyi sinah Bungtlang khua in a kuat i a tubantuk in Suu Kyi nih upatnak roca a kuat ve hi a si.
Aung San Suu Kyi nih roca a kuatmi chungah aa tialmi cu “Vice President Pu Henry Van Thio sin in ka pa lem a cuangmi fangkhat ca tlap 100 na ka kuatmi tlamtling tein ka hmuh. Atu bantuk in hmuh a hartuk cangmi ka pa lem cuangmi tangka na ka kuat caah kaa lawm tuk pin ah hi tangka na ka kuatmi cu ka rak fimhlawm lai. Pu Hrang Kaar le chungkhar nan ngandam peng ko seh” tiah roca chungah cun aa tial.
Pu Hrang Kaar nih Vice President Pu Van Thio sinah tangka a pek lio ah a rak um vemi Pu Ram To nih a tanglei bantuk in a chim.
“2015 kum Kawlram thimnak tuah lai i me lemsoinak rak ngeih lio ah Vice President Pu Henry Van Thio le keimah tiin Bungtlang khua kan phan. Cu lio ah Pu Hrang Kaar nih 1967 kum lio Vom hninh ka zuarmi man, cozah nih an rak thahmi tangka Aung San lu cuangmi tangka fangkhat ca tlap 100 packing te cu a chuah i Vice President cu hihi Aung San Suu Kyi nan ka pekpiak kho hnga maw a rak kan ti caah Vice President nih pekpiak kho tiah a rak ti caah Aung San Suu Kyi cu a pek tikah roca a vun pek hi a si. Roca le hnget-taih dur nga a vun kuat. Roca hi pahnih a si ko nain a chung ca cu aa khat ko” tiah Thantlang peng NLD EC chungtel Pu Ram To nih TCP ah a chim.
Pu Hrang Kaar nih, “ka thih thlak si, kaa lawm tuk tiah lunglawmhnak bia zong a chim ve. Hi roca cu ramkulh cozah in, pengkomh sin pek hnu ah Hakha pengkomh lutlai. Thantlang penguk bawi, Thantlang peng NLD EC chungtel minung pahnih le a dangdang tuanvo ngeitu hna tel in June 19 Bungtlang khua ah pekchanhnak an va tuah.
Daw Aung San Suu Kyi nih a chuahcam tuak lawmhnak ni theng te ah a tu bantuk in roca a kuat le pekchanhnak an ngeih hi a si.
About The Author
