Daw Aung San Suu Kyi Nih Tikir Dam Le Electric Mei Hunnak A Tuah Cang
Salai Elvis| 2019 January 20| Rampi ruahnak petu Daw Aung San Suu Kyi nih Thantlang peng Tikir kual i tikham (Dam) le Electric mei cu January 20 chun ah hunnak a tuahpiak cang hna tiah kan theih.
Aung San Suu Kyi cu a voikhatnak Tikir khua a phak zong a si. Tikir thar UPC lung Biakinn huannak, Tikir Dam hunnak ah a kakip in a ra mi khual lawng si lo in amah Daw Aung San Suu Kyi hmuh duh ah Tikir kiangkap khua hna zong an rak tlung i khual lawng minung 2,000 tluk an phan tiah kan theih.
Aung San Suu Kyi cu mizapi hmai ah bia a chim hnu ah Dam hunnak a tuahpiak hna dih in (50 MW) a chuak mi Electric mei zong hunnak a tuah colh. Tikir kual (Dam) cu rampi cinthlaknak, zuatkhalhnak lei le see-miang zung tangah a um mi, se-miang ti hmannak kongkau tawlreltu in saknak lei tuanvo latu phu (No.3) nih tuanvo lak in 2016 kum hrawngah rian an rak thok i 2018 kum dih lai ah rian an lim cangmi a si tiah kan theih.
Tikham (Dam) riantuannak caah ramkulh cozah budget tel lo a dang tein 2billion dih in an sak mi a si i mah tikham mi nih mei lawng si lo in cinthlaknak ca le dum zing ti a pek chih hna. A tu lio mei tha nih Tikir khua mi hna cu suimilam 3 tluk mei a pek cang hna tiah kan theih.
Rampi Ruahnak Petu Daw Aung San Suu Kyi cu Tikir Dam a hun dih in Thantlang ah a rak kir i Town Hall ah Thantlang khuami he ton biaruahnak le biahalmi lehnak an ngei kho. Atu tlawmpal ah Thantlang in Hakha ah a rak kir lai i Carson Hall ah Hakha khuami zapi he ton biaruahnak a ngeih than lai.
January 20 zan cu Hakha ah riak lai i January 21 zingka ah Khuacuanhnak Parthlam (tower) le Lai Kutka “Lawng” hunnak a tuah lai. Cu dih in Hakha college le sianginn dangdang a zoh dih in Falam Surbung tlang vanlawng tual a zoh lai. Cun, Tonzang ah Daw Khin Kyi Foundation nih khuami inn 46 an sakpiakmi a zoh dih in Kalay ah a kir than lai tiah kan theih.
Photo Credit: The Chinland Post (Salai Elvis)
About The Author
