Daw Aung San Suu Kyi Nih Tikir Dam Le Electric Mei Hunnak A Tuah Lai
Tawk Tling Thang| 2019 January 14| Rampi Ruahnak Petu Daw Aung San Suu Kyi nih Chin ramkulh, Thantlang peng Tikir Dam le Electric Mei hunnak a tuah lai tiah Chin ramkulh cozah zung in thawng kan theih.
“Vice President Pu Henry Van Thio khua ah tuahmi Tikir Dam le Electric Mei hunnak cu rampi ruahnak petu Daw Aung San Suu Kyi nih January 20 ah hunnak a tuah lai. Tikir Dam cu tangka tampi dih in sakmi a si, mah Dam in a chuakmi meitha nih khuami zong electric mei a pek khawh hna. Electric mei thazaang a chuakmi hi 50 kilowatt a si” tiah Chin ramkulh Cozah bu in chimnak nawlngeitu Minister U Soe Htet nih The Chinland Post ah a chim.
“Vice President Henry Van Thio hi Chinram tlawn ding in timhtuahnak cu a ngei. Asinain, zeitik ah dah a rak tlawn lai timi cu aa fiang lo. Tikir Dam hun ah a ra dingmi Rampi Ruahnak Petu Daw Aung San Suu Kyi he zong an ra ti kho men. Rampi Ruahnak Petu Daw Aung San Suu Kyi tu cu Helicopter in a ra lai i January 20 zan khi Hakha ah a riak lai” tiah a biapeh ah a chimchap.
Tikir Dam zong hi ramkulh cozah Budget tel lo in a dang tein MMK 2billion dih in an tuahmi a si. Hi Tikir Dam nih khuami dinti le mei a pek hna. Dinti lawng si lo in cinthlakmi le lei caah a herhmi ti zong a pek chih hna.
Thantlang peng, Tikir Dam pawngkam ah Japan Cherry kung 100 cu 2018 January thla chungah Japan pa le Vice President Henry Van Thio- a fapa tel in an rak cin. Cun, a hnu deuh ah kung 1000 zong anmah Japan mi hna he tel in an cin chap than tiah kan theih.
Tikir hi Khuahlun le Khuathar tiin an um, Dam hi Tikir Thar ah a um. Tikir Thar hi inn 60, innchungkhar 80, pa 212 le nu 168, an zapi 380 an si.
Daw Aung San Suu Kyi hi 2018 caankarlaknak thimnak tuah lai te ah Mindat le Kanpetlet zong ah a tlawng. Cu hlan zong ah Chinram, Hakha ah voihnih tluk a rak tlawng bal cang. Tutan hi Rampi Ruahnak Petu rian atlaih hnu in avoi 1nak bik Chin ramkulh khualipi Hakha a tlawn a si lai.
