Daw Aung San Suu Kyi Nobel Peace Laksawng Kan Chut Than Lai Lo

City Hunter| 2018 Tho 4| Rampi ruahnak petu Daw Aung San Suu Kyi cu Nobel Peace laksawng kan chut than lai lo tiah Noble foundation lutlai Lars Heikensten nih Reuters media ah a chim.

Tukum remdaihnak Noble laksawng peknak puai cu October 5 ah tuah an timh i hi laksawng peknak puai hlan ah Reuters media he a dangte biaruahnak ah atu bantuk in Mr. Lars Heikensten nih a chim hi a si.

“Hi laksawng cu a zungzal in a um lai. Nobel Peace laksawng cu a zungzal caah pekmi a si i laksawng pek hnu ah a dikmi thil an tuah le tuahlo kha tette hmuhsak a si lai lo. Keimah ruahnak ah cu vialte an hrial khawh lai ti zong ka zum lo” tiah Nobel Foundation lutlai Mr. Lars Heikensten nih a chim.

Hi Nobel Peace laksawng cu a petu Norway Nobel committee nih zulhphung ah laksawng chuh than ding a cohlang lo tiah August thla ahkhan a chim bal cang.

Rakhine ramkulh kong he pehtlai in zatlang mizapi cozah lutlai Daw Aung San Suu Kyi hi a cheuchum tuanvo a ngei i rian a tuanmi cheukhat lung a tling kho hrimhrim lo ti ah Mr. Lars Heikensten nih Reuters sin ah a chim.

Daw Aung San Suu Kyi cu democracy ralpi a luh caah 1991 ah remdaihnak nobel laksawng (Nobel Peace Prize) laksawng a rak hmu. 2017 August ah Yakhine ramkulh buainak a chuah hnu kumhnih chung ah nitlak lei ram tampi nih Daw Aung San Suu Kyi cu an rak pekmi minthatnak (prize) laksawng phun 7 an chuh than manh cang.
Ref: Reuters, 7Day

Na ruahning rak langhter ve.. (Leave a comment)

%d bloggers like this: