Daw Aung San Suu Kyi Sinah Thantlang Khuami Nih Thil Phunthum An Hal Lai

Salai Elvis| 2019 January 15| January 20 (Sunday) ni ah Daw Aung San Suu Kyi cu Thantlang khua a phan ding a si caah Thantlang khuami nih amah sin ah thil phunthum an hal lai tiah kan theih.

1. Thantlang peng India-Myanmar pehtlaihnak a simi Saisihchuak lam Tipi hleidonhnak ding kong.
2. Cozah lei nih tangka cawih tawnmi cu a caan tawituk caah kum saupi tiang cawi khawh ding le a karh tlawmter deuhnak ding tawlrelpiak ding.
3. Hakha sii-inn pi ah Specialist Doctor (a tthu paraku) caantling in chiahpiak ding hna hi Thantlang khuami nih hal an timhmi cu a si.

Tikir khua ah Dam le Mei hunnak a tuah dinh hnu zarhpi ni chun suimilam 12 tlukah Thantlang khua a phan ding a si lai caah a tubantuk in khuami hna zong nih sunglawi ngai donding in timhtuahnak an ngei. Daw Aung San Suu Kyi cu Thantlang khuami nih Thihni, Puan le Kor angki laksawng an pek lai tiah kan theih.

“Thil phunthum halmi chungah cozah tangka hi kumkhat ca kumcheu ca lawngin cawih a si tawn pinah tangka cawihmi a tlawm tuk, cun a caan zong a tawituk. A tu kan hal ding cu kum caan saupi cawi khawh ding le a karh zong tlawm deuh in a cawitu mizapi zong nih an i thathnempi deuh lai ti kan ruah. Cun Hakha sii-inn Specialist Doctor zong a um an ti ko nain mizaw hna hi Kalay, Mandalay hna ah lanhter peng an si tikah hi kong zong hi biatak tein kan tawlrelpiak hna seh ti kan duh caah a si” tiah Khuanu/pa lei tuanvo ngeitu Pu Lawm Bik nih The Chinland Post ah a chim.

Daw Aung San Suu Kyi cu tutan a raktlun hin Thantlang khua ah avoi hnihnak a rak phak a si lai tiah kan theih.

Na ruahning rak langhter ve.. (Leave a comment)

%d bloggers like this: