Daw Aung San Suu Kyi Zumh Lo Ahcun Rampi Harnak A Tong Lai Tiah Mee An Leemsoi
City Hunter| 2018 Tho 12| Daw Aung San Suu Kyi hmanh nan zumh lo ahcun dawh tuk in rampi harnak a tong lai tiah Magwe ramthen Chief Minister Dr. Aung Moe Nyo nih mee lemsoinak ah a chim.
October 9 ni Chin ramkulh, Kanpetlet peng Mastui khua ah caankarlaknak thimnak aa cuh dingmi NLD palai hna caah mee lemsoinak bia a chimnak ah atu bantuk in a chimchih hi a si.
“Daw Aung San Kyi a dinfelnak le a hruainak hi nan zumh lai. Nan zumh lo ahcun dawh tuk in rampi harnak a tong lai. Hihi i chingchiah uh. A lam phunkip in rian a tuan. Hnulei ah Kala he an i thua, hmailei ah ramchung ral he an i thua. A lam phunkip in hnahnawhnak an pek. Hi hna pawl ruat in khuaruahnak kaupi he zoh a herh” tiah Dr. Aung Moe Nyo nih a chim.
Chin ramkulh, Matupi ah NLD party in caan karlak thimnak ah U Aung Thang aa zuam lai. Aa zuam dingmi U Aung Thang caah NLD party centrel thimnak i teinak hmuhnak ding haotu, central hruaitu hna le Chin ramkulh Chief Minister Salai Lian Luai hna cu October 8 le 9 ah ramkulh chung ah vaak in mee lemsoinak an tuah.
Ref: DVB Burmese
