Delhi Chin Ralzaam Nih UNHCR Sinah Duhlonak Langhter Ding Le Thawngfianhnak Tuah An Timh

0

Salai Ngun San Aung| 2018 July 11| India ram khualipi Delhi ah aa dor mi Chin ralzaam pawl nih an dirhmun a himbawm rih lo buin ralzaam kong lutlai bik UNHCR nih ralzaam dirhmun in cohlan tilo ding cathanh an chuah mi cungah duhlonak langhter dingah thawngfianhnak tuah ding an timh tiah kan theih.

Hi kong ah Delhi Chin Human Right Organization ah a tuan lio mi Salai Cung Dawt nih, “Delhi khuasa Chin ralzam nih sandah piah cu timhtuah asi ko i minung thongkhat 1000 tal hi sandah piahnak ah i tel kho ding in kan timh tuah, Sandah piah lawng si loin Press conference zong puiting ngai in tuah ding in timhtuah a si. A sinain a nicaan taktak kan fehter kho rih lo, July thla donghnak zarh ah a si lo hmanh ah August zarhkhat nak ahcun tuah hrimhrim dingin timhtuahnak ngeih cuahmah lio a si. A biapi bik in UNHCR le international community sin ah halnak tuah kan duh mi cu Chin ram hi kirhnawh awk taktak ah a him rih lo, Kawlram uknak pakhat tang ah a um mi miphun dihlak chung in Chin ralzaam bak lawng tinhchih in riantuan hi a dik lo, uknak a dang tein a ngei mi kan si rih lo, Ralkap uknak chan lio in Chin mi cung ah an ngeih mi phungphai tahchunhnak Miphun dawpdolhnak timi zong hi a um peng rih. Kan biaknak, miphun sinak ruang ah namneh mi miphun kan si peng rih ko, a him hrimhrim rih lo timi hi langhter kan timh mi pawl ah aa tel” tiah TCP ah a chim.

A nicaan fehter khawh a si rih lonak a ruang cu Salai Cung Dawt nih a tanglei bantuk in a fianter.

“Ani can kan fehter khawh rih lomi a ruang zong hi felfai deuh in case study kan tuah ta hmasa, tu hi CHRO lei in case study ka tial cuahmah. Delhi khuasa Chin ralzaam dirhum kong zong ka tial cuahmah lio a si pin ah kum 2018 chung ah Chinram le Chin mi cung ah a cang mi, a bik in Cozah lei, ralkap lei ti bantuk in nuhrin covo an buar mi pawl ka khomh i ka tial cuahmah lio a si. Case study a tlang pi cu ka lim cang. Cun Delhi Chin ralzaam dirhmun in cathanh zong lim a si cang. Case study zoh chun in memorandum, media press le rational ti bantuk tial tthan ding a si ka lim bak in press conference kan tuah hmasa lai i cu hnu ah sandah piahnak zong kan ngei colh te lai, a pahnih in a donghnak bik August zarhkhatnak ahcun lim dih ding in timhtuah cuahmah a si.”

Mizapi le tuanvo upa hmai ah duhlonak va lanhter sawh sawh men lawng siloin puitling deuh tein hmual a ngei tak tak mi cawlcanghnak si ding an duh caah felfai tein can an lak i an i timhtuahmi a si nak kong tuanvo ngei upa sinin theih a si.

Cun anmah India Nuhrin Covo bu a si mi South Asia Human Rights Document Centre dirpinak in India ramchung thawnglatu pawl zong a herh ning bantuk in sawm le an thawngpang hi vawlei pi theih in thlah ding tiang timhtuahnak an ngei tiah kan theih. SAHDC, Development and Justice Initiative le South Asia Forum for Human Rights pawl nih thawngfianhnak ah dirkamh le biachim pi in UNHCR ton pi nak tiang an bawmhchanh hnik hna tiah theih a si.

Photo: Thechinexpress/google

About The Author

Na ruahning rak langhter ve.. (Leave a comment)

%d bloggers like this: