Doh- Yehmu Moe Yan Naing Nupi Nih Media Sin Ah Thil Sining Kong Thawngfianhnak A Tuah

0

City Hunter| 2018 April 23| Reuters thawnglatu pahnih tazacuai nak he pehtlai in biaceihnak ah thildik a phuangtu Doh-yehmu Moe Yan Naing i a nupi Daw Toe Toe nih April 22, Mandalay ah media sin ah thawngfianternak a tuah. A pasal thong in a luat si ahcun palek in chuah in lothlo riantuan an i timhnak kong zong a chimchih.

“Myanmar ram cozah biathlithup upadi pohmah 3 in tlaih a tongmi Doh-yehmu Moe Yan Naing cu sualnak ngei lo in tlaih a tong i hi kong ah palek bawizik ah tuanvo aa hngat. Ka pasal hi mi tlaitu ah aa tel lo. Thil sining catlap petu zong ah aa tel lo. Catlap pawl a pe maw, pe lo timi zohnak in hngalh khawh a si. Sullam ngei lo in an namnehmi, rap an fawihtermi a si. Hi kong ah palek bawizik ah tuanvo a um ti ka ruah. Ye-hmu bawizik Tin Ko Ko nih kanmah cu hramhram in an hngalhmi a tlawm, an si a fak tiah a kan namnehmi le rap a kan fawihtermi a si. Kan chungkhar cu kan nunnak (life) a rawk dih cang. Ka pasal nih a limhang caah rampi hi a pawnchuah (tit-sa-phoh) in a zuar hrimhrim lo. Thildik kan langhterpiak uh” tiah a nupi Daw Toe Toe nih a chim.

Daw Toe Toe nih thawngfianternak a tuah lio

Thawnglatu Ko Wah Lung le Ko Kyaw Soe Oo an tlaih hna hlan ah Doh-yehmu Moe Yan Naing cu 2017 December 12 ah Pope Francis Myanmar ram khual lamthluan humhimnak rian in Sule lei a kal lio ah Ye-hmu- bawizik Tin Ko Ko le Doh-ye–tat-yin-hmu nih an auh i an tlaih.

Reuters thawnglatu pahnih thong rap chiahmi in tlaih an si kong Doh-yehmu Moe Yan Naing nih biaceih zung chung a chimmi cu zumhawk tlaklo tette a si tiah hrawh an i zuammi cung ah thildik hlathlaipiak ding in Daw Toe Toe nih nawlnak bia a chim.

“President U Win Myint le rampi ruahnak petu Daw Aung San Suu nih thildik leikap tanh in a kan dirpi lai ti ka zumh i ka bochan fawn hna. Ka pasal nih biaceihnak chung i thildik a phuan caah kaa lunghmuih. Palek bawizik Tin Ko Ko nih a hngalh bik ko. Catlap pawl thawnglatu hna a pek le pek lo zong amah nih a hngalh bik ko. Ka pasal phuanmi hi a dikmi a si” tiah a chimchih.

Biaceih zung i thildik a phuan hnu a thaizing bak ah Doh-yehmu Moe Yan Naing i a chungkhar cu Naypyidaw ramthen palek umnak inn in an thial hna.

Doh-yehmu Moe Yan Naing hi sualnak ngei lo in namnehmi a si tiin Daw To Toe nih a chimmi hi a diklo tiah Naypyidaw palek bawi ye-hmu-gyi Myo Thu Soe nih a lehrulh.

Ka pasal an tlaih hnu atu ahhin chungkhar eidin fenh-aih kong fakpi in harnak kan tong. Ka fale pathum fimcawnnak kong zong ka ruat kho rih lo, fakpi in harnak kan tong. Ka pasal hi an thlah i a rian an pek than hmanh ah palek in a chuak lai i lothlo riantuan in kan i cawm ko lai. Kan fale fimcawnnak hi biapi ah chiah in fale caah tuanvo tlingte in kan tuahpiak ko hna lai tiah Daw Toe Toe nih a ti.

Doh-yehmu Moe Yan Naing cu suallam ngeilo in an tlaih i atu tiang a chungkhar hna he pehtlaihnak a um ruang lo ah hrem a tuar lai tiah a chungkhar an thin a phang.

Rampi cozah biathlithup upadi he tlaih le tazacuaimi Reuters thawnglatu pahnih cu palek phu nih thong rap chiahhnawh in tlaihmi an si tiah Endin palek sakhaan in Doh-yehmu Moe Yan Naing nih April 20 biaceih zung ah a chim.

Doh-yehmu Moe Yan Naing hi Sagaing ramthen, Khin-oo khuami a si. 1999 kum ah Myanmar palek phu ah a lut. Cu hlan ahcun siang cachimh rian a tuan.

Rakhine ramkulh runvennak rian an tuan hnu Rangoon khua a rak phan thanmi palek phu hna lemsoi pehtlaihnak tuah in a biapimi runvennak catlap pawl ramleng media zung kuat ding ah thawng an la tiah Reuters media zung in Myanmar thawnglatu Ko Wah Lung le Ko Kyaw Soe pin ah palek phu chungtel Doh-yehmu Moe Yan Naing le tat-ciat-gyi Khin Maung Lin, an zapi pali cu Myanmar cozah biathli thup upadi pohmah 3 in 2017 December 12 zan ah an tlaih hna.
Ref: 7Day Daily News, DVB Burmese

About The Author

Na ruahning rak langhter ve.. (Leave a comment)

%d bloggers like this: