Don Bosco University A Kai Mi Chin Ralzaam Caah Sianginn Kai Man Hmuh Than Ding In An Hal  

Salai Cung Cung|2019 March 21| India ram New Delhi Don Bosco University ah sianginn a kai mi Chin ralzaam caah sianginn kai man bawmhnak (Scholarship) ngah khawhnak ding tuahpiak than ding ah UNHCR cu Chin ralzaam Committee nih an hal hna. 

Chin ramkulh ah ramkhel, zatlaangnun, himnak lei a thancho chin lengmang cang tiah Malaysia le India nih Chinmi ralzaam dirhmun in cohlan  ti lo ding in UNHCR nih 2018 June ah an thanh hnu ah Don Bosco University ah a kai mi Chin Siangngakchia pawl cu sianginn kai man an pe ti hna lo. Nain Chin ramkulh cheukhat hmun ah himnak a um lo caah UNHCR nih March 14 cohlan an si thannak kong thawng an thanh i March 18 UNHCR zung tonpumhnak ah tubantuk in sianginn kai man pek than ding an hal hna hi a si tiah New Delhi Chin Human Right Organaization tuanvo ngeitu Salai Cung Dawt nih a chim.

“UN nih Chin ralzaam bawmh ti lo ding a ti hnu ah Partner a si mi Don Bosco nih bawmh mi Scholarship University a kai mi The Fee Scholarship zong an pe ti hna lo. Cucaah hi Scholarship cu arannak in pekthan ding ah kan hal. UN lei nih Don Bosco cu pehtlaihnak kan tuah lai i a si khawh chung in kan i zuam lai a ti” tiah a chim.

Hi Don Bosco University ah a kai mi Chin ralzaam Siangngakchia hi minung 15 an si. A cheukhat cu Scholarship rinh in sianginn a kai mi an si caah Don Bosco nih sianginn kainak man pek lo cun pehzulh in sianginn kai kho ding dirhmun an si lo tiah Salai Cung Dawt nih a chim.

Chin ralzaam cu bawmh an herh rih ko tiah UNHCR nih thawng thanh mi cung ah Chin ralzaam pawl nih Pathian sin lunglawmh thlacaamnak cu March 22 ah an tuah lai tiah kan theih.

Ref: Khonumthung

Na ruahning rak langhter ve.. (Leave a comment)

%d bloggers like this: