Dongh thiam lo NLD ‘cakuat bawm’ polisi
Salai SH Lian: Editor| 2019 February 27 – Ramkomh Kawlram, kan rampi a thlen khawh nakhnga cawlcangh cio a si. Hriamtlai he tlai lo he an si. Ramkhel riantuan mizapi cu chim lo, siangngakchia tiang hmanh an rak i tel. A cozah riantuan lila tiang hmanh an rak i tel bal ko dahkaw, dohdalnak ah! Mirang pennak in zalonnak kan hmuh hnu, tlangcung miphun hna le Kawl miphun tiah hnatlaknak ngeihmi thawng lawng in Ramkomh Kawlram (Union of Burma) tiah vawleicung ah ram pakhat in a dir hi a si. Hihi kan philh lo ding ah a biapi. Anmah Kawl lawng nih sermi phun le anmah ngeihmi phun ah an i ruahmi hi a dik lo. Cucu vawleipi theih in ram pakhat tiah kan dir ni thawk in nihin ni tiang a buai, kum 70 lengkai a si cang. Kan buaibainak, harsatnak le kan duhmi kan ngah khawh nakhnga, thlennak a um khawh nakhnga a lamkip in rak cawlcangh cio cu a si. Zalonnak hmuh cangka in, Hriamtlaih le hriamnam hmang in Karen nih an hun thawk colh i, Kachin tbk., tlangcung miphun dang le kanmah Chin miphun tiang nih hriamtlaih in hun doh a si. Cucu, uknak le pennak thalo tiah ruahmi dodaltu ah cun tlangcung miphun lawng silo in Kawl zong an um liangluang. Cu chung ah, Ramkomh Kawlram zalonnak ah Pa bik pakhat ah ruah mi fanu Pi Aung San Suu Kyi nih a hruai mi phu NLD hi an si ve.
Ruahchannak he kum saupi, kum 25 fai an cawlcangh hnu ah 2015 kum ah teinak nganpi an hun hmu. Teinak an hmuhka, Cozah an si hnu ah NLD upa pakhat nih, ka naule kan nih zong dohdaltu ‘revolution tuahmi’ dawh kan si hih tiah a ka ti bal. Cucu mizapi nih dohdaltu caan saupi an rak si ruang ah, ruahchan le bochan bikmi an sinak a ruang ah a si. Asiloah, a dang hlei thim ding kan ngeih rih lo ruang zong ah a si kho. Cozah thlen nakding caah thimnak luhnak in ram a khelmi an si bang, 2015 an hlawhtlin ning bel a ropui ko. Cucu, 2008 phunghrampi ning in thimnak ah Ralkap nih anmah caah an chiah cangmi telhlo in, cuhdingmi le cuh awk a thami thutnak vialte chung ah 887 an rak hmuh, zatuak 77.1% tluk a si. Tlangcung miphun hmunhma zong ah tamlak an hui! Hihi, a ngaingai ahcun, mizapi nih Ralkap chan in, USDP chan kan si cang. Atu cu nanmah nih kum 5 chung kan hruai cang u, kan uk cang u. Caan sau tuk dodaltu nan si cang. Atu cu nanmah kan in zumh hna tiah an zumhnak an langhtermi a si. Cucu, mizapi sin in a rak rami nawlngeinak a si. Nain, atulio kan sining le uknak ningcang zoh tik ahhin, Ramkomh siseh, Ramkulh/ramthen siseh, mizapi nih an kan thimmi le nawlngeihnak an kan pekmi a si tihi an philh hlah maw tiah hal ding phun in a hung um cang. Cun, dohdaltu dahkaw kan si ve hih tiah a caanlo ah an chimmi a si ko nain, an rak si ve taktak balmi kha an i philh hlah maw tiah ruah awk a um cang. An rak dohdal lio ah an chimrelmi le atu an tuah ningcang a dang ngaingai cang.
Cucu, kum 2015 Mizapi thimnak in cozah an hung tlin bak in ‘Cakuat Bawm Polisi’ an hmang! A cunglei (central) in a tanglei ah cu cakuat in hun pehtlaih a si. An cakuat bawm in cozah an ser i nihin tiang an cakuat bawm cu a chawklet, a tlungkal peng ko rih. A hramthawk ah an rak donmi le tincomi ‘Cakuat Bawm’ cu a rel nuam, hmaipanhnak a chuahpi theu. Nain, a hnu deuh ah donmi le tincomi Cakuat Bawm bel cu a thlum-al tuk lem ti lo. NLD Cakuat Bawm a phanhnak hmunhma a tampi ko men lai. Kanmah he a naihniam bikmi tete hun char ninglaw, naitan Suu Kyi nih tlangcung miphun khuaram a phanh hnu ah a cangmi a si. Kachin ramkulh ah Minister (Vuanci) a tuan liomi pathum bak phuah ding in ca an hei kuat hna_Cakuat Bawm! Cun, kanmah Chin ramkulh zong ah Hluttaw Haotu-chang dinhter ding ah cakuat bawm a hun phan. Cuhlan zong ah a phan bal cang. A taktak le a ngaingai tiah ahcun, zaukphung ningte in NLD palai aiawh in mizapi nih thim mi an si ko cang caah mizapi nih nawlngeih dingmi a si. Atulio kan sining ahcun, a cunglei lawngte in anmah duhning tein an hun tawlrel, an duhmi an thumh hna, an duhmi an kaih hna.
Hihi, a taktak ah anmah NLD chung hrimhrim ah zaukphung in an kal maw timi biahalnak a chuahter. NLD timi National League for Democracy nih zeitindah zaukphung hi an i fian timi khua a ruahter. Cun, a hleikhun in mizapi aiawh MP a tlingmi zong nih an duhmi paoh biahalnak an tuah kho lo tiah thawngpang zong a leng. Cucaah, NLD nih an hmanmi cakuat bawm phung hi cu zaukphung sinak he a kalh ngaingai lai dah! A ruang cu 2015 Ramkulh thimnak ah Shan le Arakan/Rakhine nih teinak an hmuh. Nain, anmah cozah an tlaihter duh hna lo. A hlan ralkap chan bang, Ralkap bawi nih anmah le duhnak poah rian an i khinh i, an duh tik poah ah an i thumhmi/phuahmi phung cu NLD nih zaukphung in an kal taktak ko ahcun an hman ding a si hrim hnga lo.
NLD nih cun Ralkap le USDP cozah hlun nakin a tha deuh a si khawh lo hmanh ah phun dang deuh in an tuah ding a si. Nain, ramkulh cozah sining ah cun a thlengmi a tlawm ngaingai. Naitan, Pi Suu Kyi nih Laitlang a tlawng i, a hlei in Tikir tiang a phan. A phanhmi cu a tha tuk ko. Nain, Ralkap chan lio he timhtuah ning a danglo mi cu Thantlang ah fimnak a cawng lio mi siangngakchia (tang 9, 10) kha Tikir ah a dongtu ding le laam ding ah an kalter hna. Ca an cawng lo! Cacawng dingmi kha cacawn lo in thil dang tuahter cu an covo an buar hna a si. Ralkap chan lio ah, Ralkap nih mipi nih an kan duh ko, an kan don ko timi langhternak ah hramhram in rak tuahmi pawl hi an pehzulh ding a si lo. Tikir ah an kalter lawng silo in, Hakha khualipi a cang thiamthiam. 2015 ah mizapi nih thim an si ko cang cu ta, zei ruang ah dah hramhram in don i fial in a herhlomi cu tuah peng a hauh? An tuah ding a si tilo mi kong ah, chimrel ding tampi a um liangluang rih hnga. A hlei khun in zaukphung mui a lenglomi NLD cunglei nih an duh ning poah in tuahmi ‘Cakuat Bawm’ kong ahcun, ruah deuh ngaingai a hau cang!
About The Author
