Dothlennak Phu Pawl Nih Thabeikkyin Khua An Lak
The Chinland Post | 2024 August 26 — Mandalay ramṭhen, Pyin Oo Lwin pengkomh, Thabyeikkyin khua ah hram a bunh mi SAC ralkap pawl cu an doh khawh dih cang hna caah Thabyeikkyin khua cu an lak khawh cang tiah PDF, kahdohnak hmunhma No. 1 nih thawng an thanh.
Thabyeikkyin khua hrambunh SAC Tah-Nah-Tah 1, Sah-Khah-Tah 2, Tah-Tah-Kah 13, Palek, pyusawhti tiah thazang 130 hrawng cu Pyin Oo Lwin pengkomh Battalion 1, 2, No. 509, 510, 512 Battalions, Mandalay pengkomh Battalion 5, Mandalay pengkomh Drone phu, Shwebo pengkomh Drone phu, Kanbalu pengkomh W-89 phu, Kanbalu pengkomh AA Gun phu, Thabyeikkyin PDF hna nih August 25 zinglei ah tlamtling tein an lak khawh hi a si tiah theih a si.
Thabyeikkyin khua hi Dothlennak phu pawl nih August 17 in an kah cang i August 19 ah khua cu an lak khawh cang nain SAC ralkap pawl cu Myo-oo-taung pura tlang lei ah an kir caah pehzulh in an kah hna hi a si tiah theih a si.
Kahdohnak chung ah SAC lei nih Jet vanlawng in bom lung 70 leng a thlak i Y-12 in bom lung 150 leng a thlak bantuk in Mi-35 zong nih kahdoh a bawmh hna tiah theih a si.
Khua lak kahdohnak ah SAC lei Lt. Colonel Soe Min Thu an tlaih khawh i hriam zuun 68, kuan 18,669, bom lung 42, RPG kuan 36, Jammer 3, pehtlaihnak seh 1 le adang thilri pawl an lak khawh. Dothlennak phu lei in hriamtlai 4 nih an nunnak an pek ve tiah No. 1 kahdohnak hmunhma nih thawng an thanh.
About The Author
