Dr. Aung Ngwe San_ Covid Pulrai Khamnak Sii Chunh Tik Ah Zuu, Rithaisii Hrial A Herh

COVISHIELD India Chuahmi

Salai David Van| TCP-Hakha| 2021 January 27| Covid pulrai khamnak sii (covishield) i chunh tik ah kuak, kunza, zuu le rithaisii tbk pawl hrial ah a tha tiah Chinram kulh ngandamnak zung lutlai Dr. Aung Ngwe San nih nihin January27 media pawl interview ah a chim.

Hi kong he pehtlai in Dr. Aung Nwe San nih “Covid pulrai khamnak sii(Covishield) chunhnak kong he pehtlai in tuah ding le hrial ding a um. Sii chunh tik ah hin kuak, kunza, kunpawng, zuu le rithaisii pawl hi covid pulrai khamnak si a rian tuannak dawn khaan tu an si caah sii chunh lio hrawng hi cu hrial ah a tha. Cun hi bantuk sii i chunh tik ah hin pumpak pakhat cio thazaang thawn a herh caah zaanglek lentecelhnak thaba tuk in tuah lo ding, mikuh cim tein ih ding, thazaang caah a tha deuh mi tirawl pawl eipiak ding le a si khawh chungin lungthei lo tein um ah a tha tiah” nihin media pawl interview ah a chim.

Chinram kulh chungah ngandamnak zung riantuan dihlak hi minung 2000 reng lo an si i Hakha peng chungah rian a tuanmi minung 500 tluk an si. Covid pulrai khamnak si hi chaklei laitlang ah cun chunh hram an thok cang nain tlanglei laitlang Palewah lei tu cu sii a phak rih lo caah an i chun kho rih lo. Atu hi vanlong in Pakoku tiang a phan cang i an va laak lio a ruah hlan ah a phan chom lai I chunh hram an thok colh ve ko lai tiah tuanvo ngeitu sin in theih a si.

India chuak covid pulrai khamnak si (covishield) hi Myanmar ram ah 1.5million a phan i minung ting7 chunh hmasa an si. Cu chunh hmasa mi hna cu ngandamnak zung riantuan hna le cozah lutlai pawl an si tiah theih a si i nihin January 27 thok in kawlram pumpi ah chunh hram an thok cang tiah theih a si.

Na ruahning rak langhter ve.. (Leave a comment)

%d bloggers like this: