Dr. Aye Maung Hi Ramkhel Thongtla Ah Chiah Kan Tim Lo; NLD Party

TCP-Hakha| 2019 March 22| Rakhine ramkulh, Sittwe pengkomh biaceih zung nih Dr. Aye Maung cu thong kum 22 thlak ding in bia an khiahmi he pehtlai in NLD party chimnak nawlngeitu Dr. Myo Nyunt nih ramkomh in thenchuahnak ding a chim ruang ah ramkhel thongtla ah kan chia kho lo tiah RFA ah a chim.

“Rakhine ramkulh buainak kong he pehtlai in ramkomh hnorsuan awk a tha lomi a si i a zalongmi Rakhine ram timi a chim ahcun rampi hlenrawinak upadi ning in dantat a si ko lai. Upadi nih a onh lomi ramkomh thenchuahnak kong a chim ruang ah ramkhel thongtla ah kan chia kho lo, misual thongtla a si ko lai” tiah Dr. Myo Nyunt nihcun a chim.

Dr. Aye Maung le catialthiam Wai Hin Aung cu March 19 ah Sittwe pengkomh biaceih zung nih rampi dohkalhtu case in thong kum 20, rampi hlenrawi muisam chiatternak case in thong kum 2, a zapi thong kum 22 tla ding in biakhiahnak an tuah.

Dr. Aye Maung cu a luancia January thla ah Rakhine ramkulh Yateh-taung peng ah tuahmi caholh kong biachimnak pakhat ah Rakhine hriamtlai dothlennak kong a chim chih tiin taza an cuai i atu bantuk in biakhiahnak an tuah hna hi a si.

Ref: RFA

Na ruahning rak langhter ve.. (Leave a comment)

%d bloggers like this: