Dr. Hmuh Thang thimnak aa cuh rih lai; NLD le Chin Party minung an i fiang rih lo

Aralaimi 2020 Kawlram thimnak Thantlang ah atulio USDP in MP a tlingmi Dr. Hmuh Thang cu peh in aa cuh rih lai tiah thawng kan theih.

Dr. Hmuh Thang nih 2020 thimnak ah cuhding aa timh rih nak cu May 23 i Lungsamat Media he tonbiaruahnak ah a chim hi a si.

“2020 thimnak ahcun kaa tel than ko lai. Cunglei (USDP) upa zong nih tel ding an ka duhpiak mi a si. Amah belte a donghnak a si ve cang lai,” tiah a chim. Cun cuh aa timhnak hmun hi, “atu lio ah tlinnak a simi Thantlang peng ramkulh hluttaw hmunhma thiam a si lai” a biapeh ah a chim chih.

Aralaimi 2020 thimnak ah Chin ramkulh in CNLD, NLD le USDP in Party puam pathum aa cuhding a si i, an dihlak in aa cuhding minung cazin an i fiang rih lo.

NLD aa cuh ding thimnak kong ah, “Kanmah cu Party nih aa tlak timi thim kan si te lai. Atu Thantlang hmanh ah cuh ding ca a ttialmi minung 10 tluk kan si cang. Kanmah cio zong kan i cuh rih le cuh rih lo kan i fiang rih lo. Party nih bia a kan khiahpiak te lai,” tiah atu lio NLD in Pyithu Hluttaw MP Pi Ni Sui Lian nih a chim.

Chin Party zong atu tiang minung aa cuhding an i fiang kho rih hna lo. “Cuh a duhmi kan tam ngai ko. Nain ahlan i a sung cangmi, mipi nih an duh ti lo hna nih cuh rih an duh tikah, kanmah Party chung ah biaruah le i siamremh dingtete kan ngei pah. June thla dih ahcun aa cuhding minung kan i fiang cang ko lai,” tiah CNLD in upa pakhat nih The Chinland Post ah a chim.

Kawlram phunghrampi ning in thimnak cu kum (5) dan ah tuah a si. 2020 thimnak cu aralaimi November chung ah a si lai tiah kan theih.