Dr. Hmuh Thang USDP aiawh in Thantlang peng Pyithu Hluttaw in aa cuh lai

Chin ramkulh USDP Chairman a si mi le atu lio Thantlang peng No. 2 Pyine Hluttaw in MP a tuan liomi Dr. Hmuh Thang cu aralaimi ramkomh Kawlram thimnak ah Thantlang peng Pyithu Hluttaw in aa cuh lai tiah thawng kan theih.

Thantlang peng USDP aiawh in aa cuh ding hna cu Pyithu Hluttaw ah Dr. Hmuh Thang, Amyotha Hluttaw ah Pu Zo Peng, Pyine Hluttaw No. 1 ah Pu Van Ni le No. 2 ah Pu Siang Lian Hmung hna an si tiah kan theih.

Dr. Hmuh Thang hi Pyine Hluttaw in i cuhding ah ca a chiah nain USDP upa nih Pyithu Hluttaw ah i cuh ding in an rak thim hi a si tiah USDP chungtel le amah he aa naihniam mi nih The Chinland Post ah a chim.

NLD in aa cuhding zong an fiang cang i Pyithu Hluttaw in Pu C Za Cung, Amyotha Hluttaw in Pu Henry Van Thio, Pyine Hluttaw No. 1 in Pu Chan Ham le No. 2 in Pu Ni Sui Lian hna an si.

CNLD (Chin Party) in Thantlang peng ah aa cuhding thanh a si lo nain Pyithu Hluttaw in Salai Van Bawi Lian @Martin, Pyine Hluttaw No. 1 in Salai Ceu Bik Thawng le Pu Lal Maung Cung, No. 2 in Saya Rung Kaw nih MP cuhding in min an pek i Amyotha Hluttaw in aa cuhding ca a chiami an um rih lo.

Pyithu Hluttaw in cuhding ah zapi nih uar ngaimi Salai Van Bawi Lian le Laimi nih kan upat tuk mi Dr. Hmuh Thang an i cuhti ding in zapi nih cuanh cio mi a si lai tiah tampi nih an ruahdamh.

Na ruahning rak langhter ve.. (Leave a comment)

%d bloggers like this: