Dr. Sasa Hruaimi Health and Hope(Myanmar) nih COVID-19 Dohnak Kyat Sing 2000 leng Thilri le Sii, Theihternak Poster Hlutnak Chin Ramkulh Cozah sin A Tuah

The Chinland Post-Hakha |2020 April 20|Chin ramkulh chungah COVID-19 dohnak, zohkhenh runvennak caah Dr. Sasa hruaimi Health and Hope(Myanmar) nih kyat sing 2000 leng thilri le sii, theihternak poster hlutnak cu 2020 April 20 zanlei 4:00pm Chin Ramkulh Cozah zungkhan ah Dr. Sasa anau Health & Hope (Myanmar) Deputy Executive Director Dr. Sa Kie le riantuantu hna nih Chin ramkulh cozah sin pekchanhnak an tuah cang tiah thawng kan theih.

Chin Ramkulh COVID-19 Zawtnak Dohnak le Zohkhenh runvennak chairman, Chin State chief minister Salai Lian Luai nih bawmhnak cu a cohlan. Hi bawmhnak ahhin Chin ramkulh Cozah siizung vialte caah sii-ai le thilri phun (18), khuate (140) caah sii-ai le thilphun (28), COVID-19 ralrin theihternak poster pawl pek an si. Sii-ai le thilri hi aman in Kyats 2000 leng le poster caah sing (100) tluk an si.

Health and Hope (Myanmar) Deputy Executive Director Dr. Sa Kie nih ” Dr. Sasa cu India a tlawnnak in lam phihkar a a si caah Chin ram a rak phan kho rihlo. Hi bawmhchannak Cozah sin pek ah a kan rat hi a si, hi Cozah sin in Chin ramkulh siizung dihlak a phan te lai. Khuate lei tu hi cu kanmah Health & Hope (Myanmar) Lailenpi zung riantuantu pawl nih COVID-19 runven, zohkhenh tlopnak kong chim pah in pek kan timh. Khua (140) hi Health & Hope (Myanmar) nih sii lei training rak pek balmi khua deuh an si i Mindat, Paletwa, Matupi, Hakha, Thantlang khuate pawl an itel” tiah The Chinland Post ah a chim.

“Ngandamnak lei lawng a tuanmi kan si lo, thanchonak kong zongah fak pi riantuan kan itim. Paletwa ralzam hna caah sii le ai lawng silo in hmailei pawcawmnak kong zongah zeitin dah rian kan tuan lai ti kan ruah cuahmah lio a si” tiah a biapeh a a chim.

Health & Hope Myanmar (HHM) cu 2007 ah Dr. Sasa nih Chin miphun ngandamnak, eidin bawmchannak le fimcawnnak timi thanchonak lei caah rak dirhmi a si. Chin ram chungin minung 834, nau ngeihterning training pekmi minung (150) lengin rian a tuan cuahmahmi a si. Chin ramkulh Lailenpi ah zung an chiah I minung riantuantu (37) in rian an tuan cuahmah lio a si. Chief Executive Officer (CEO) ah Dr. Sasa, Deputy Executive Officer ah Dr. Sakie le Patron ah Prince of Wales an si tiah kan theih.