Dr. Tin Maung Shwe Nih Chin Ramkulh Ngakchia Kum 5 Tang An Thihnak Bik A Ruang A Fianter

0

Salai Cung Cung+ City Hunter| 2019 March 26| Chin ramkulh kumhnih chung ah ngakchia kum 5 tang 994 an thi. Hi kong he pehtlai in Chin ramkulh Ngandamnak zung lutlai Director Dr. Tin Maung Shwe nih ngakchia kum 5 tang an thihnak a ruang le thil sining kong The Chinland Post ah a chim.

“Zatuak in Chin ramkulh chung ah  kum 5 tang Ngakchia 1000 hrinmi lakah minung 104 an thi peng.  2017 Chin ramkulh chung kum 5 tang ngakchia a thimi zapi hi 354 an si. Ngakchia thihnak tambik cu an hrin hnu in suimilam 42 chung ah a thimi  le zarkhat hnu a thimi an tam. Hi an thihnak a ruang cu sii-inn ah an kal kho lo. Sii-inn rat khawh lonak a ruang cu lam le sul lei pehtlaihnak a har caah a si. A cheu cu sii-inn ah mizaw i zohkhenh a har caah a leng nau ngeihter thiammi an i ngeihter. A cheu cu anmahte in (nule le vale nih) nau aa ngeihtermi zong an um. A si khawh cung in sii-inn ah nau rak i ngeihter uh kan ti lengmang ko hna nain an ngai duh lo. Inn i nau an hrin tikah a thianghlim ti lo, nau an i ngeihter ning zong ningcangte a  si ti lo caah ngakchia caah harnak tampi a um. Cu ruang ah nau an hrin suimilam 48 chung ah a thimi an tamnak hi a si” tiah Chin ramkulh  Ngandamnak zung Director Dr. Tin Maung Swe nih The Chinland Post ah a chim.

“Hi bantuk zawtnak in a thimi pawl hi ngandamnak lei saya-mah sin ah rianrang in i zohter khawh ah cun an nunnak khamh khawh mi zong an um lai. Asinain Chin ramkulh lam le sul lei a that deuh lo caah tam deuh hi siibawi sin i zohter ding ah an hnu. Sang le veng ah cawnnak ngeih lomi mi nih an zoh hna i a dognhnak sii-inn an phanh tik cu zawtnak cu a hnuttuk hnu cun khamh a har cang. A cheukhat cu fahrin tikah a thinlung arang, fa palinga ngeih duh tikah a tlawmbik kumhnih dan in hrin ding an si. A cheu cu pezulh in hrin hmang mi an um. Cu pezulh in an hrin tikah ahmasa hrinmi fa kha vitamin a chambau, zohkhenhnak a tlawm, cun hrin than dingmi fa caah timhtuahnak um ti lo. Tuan tein an hrin than tikah a tlamtling ti lo, pound tling lo in hrin a si cang. Cucaah ngakchia tampi thihnak lei an panh. Fahrin tikah kum hi tha tein zoh ah cun tubantuk thih lonak hi a tlawm deuh lai” tiah Dr. Tin Maung Swe nih a chim chap.

2017, kumkhat chung Chin ramkulh ah ngakchia kum 5 tang a thimi 354 le 2018, kumkhat chung ah ngakchia a thimi 640 an si, kumhnih chung ah a thimi zapi 994 an si. 2017  kum nakin a letkhat in a thimi an tamdeuh tiah kan theih.

Chin ramkulh Ngandamnak zung lutlai chang Assistant Director Dr. Sharon Par nih,“Ngakchia kum 5 tang an thihnak bik a ruang cu Pneumonia, thla tlinglo, pound tlinglo, le Birth Asphyxia (thawphihnak a siloah mahhngal loin umnak)  an si. Hi pathum cu damh khawh ding mi lawngte an si” tiah  Chin ramkulh ngandamnak zung in Assistant Director Dr. Sharon Par nih The Chinland Post ah a chim.

“Tahchunnak ah Cancer zawtnak tibantuk cu damh khawh a si lo, nain mah pawl zawtnak hi cu a caanhman tein le ningcang tein thlop ah cun damh kawh ding lawng te an si. Pneumonia zawtnak pawl hi an ngeih leh cangka tein sii-inn asilole ngandamnak lei rian a tuanmi sin ah kalpi colh a hau. Asinain mitam deuh nih an hngal ti lo. Cun thlatlinglo pound tlinglo timi cu naupawi lio ah siibawi asilole ngandamnak lei riantuantu hna sin ah kal lo in mah le duh ning paoh in sii an eidin caah hi bantuk a chuak. Ei le din i hramh khawh lo ruang zong ah a chuak fawn. Nu naupawi lio ah a tlawmbik voi 4 tal siibawi asilole ngandamnak lei riantuantu hna sin ah i zohter a hau. Asphxia timi cu cawnnak ngeilomi sin ah nau an ngeih tikah nau tha tein zohkhenh zia an thiam ti lo caah thihnak hi a tam” tiah a chimchap.

2018 kum Chin ramukulh ah kum 5 tang ngakchia a thimi minung 640 an si i a thih bu in a chuakmi hi minung 241 an si. Milu zat zatuak in tuakchunh tikah kum 5 tang ngakchia tambik an thihnak peng cu Kanpetlet, Matupi le Mindat peng an si tiah kan theih.

2017 Chin ramkulh chung kum 5 tang ngakchia zapi minung 61811 an si. 2018 Chin ramkulh chung kum 5 tang ngakchia zapi minung 62018 an si tiah Chin ramkulh ngandamnak zung in kan theih.

Fahrin tikah a thiam mi siibawi sin le sii-inn ah fahrin khawh i zuam ding. Cun chungkhar lei zong nih nau pawimi sii-inn le siikhan ah zohter ding thazaang peknak ngeih  ding. Naupawi cangka in hrin tiang a tlawmbik voi 4 hrawng siibawi sin le thiamsang mi sayamah sin ah zohter ding. Fahrin tikah a tlawmbik kum 2 dan in ngeih ding tiah Chin ramkulh ngandam zung nih cawnpiaknak an ngeih tawn hna tiah kan theih.

About The Author

Na ruahning rak langhter ve.. (Leave a comment)

%d bloggers like this: