Dr. Za Hlei Thang Ruak Cung Ah Chief Minister Salai Lian Luai Le Dr. Salai Lian Hmun Sakhong Biachimnak An Ngei Lai
City Hunter| 2018 May 4| Dr. Za Hlei Thang ruak cu May 3, sml. 3:00 tluk ah Falam khuapi an phakpi cang. A ruak cu Falam Town Hall ah an suan i thaizing (May 5) ah an vui lai. A ruak cung ah Chin ramkulh Chief Minister le CNF in Dr. Salai Lian Hmung Sakhong nih biachimnak an ngei lai tiah kan theih.
Dr. Za Hlei Thang ruak cu US in an rak tlunpi i May 2 zan ah Yangon an phan. Motor in an rak tlunpi colh i May 3 zan ah Kalay an phakpi. Kalay, Bethel Theological Seminary ah a ruak cu zankhat an riahpi i May 4 zingka, Falam khuapi hoih in an kaipi than. Falam khuapi cu May 4 zanlei suimilam 3:00 tluk ah an phakpi. Yangon ah siseh, Kalay ah siseh, Falam ah siseh, a ruak a dongtu hi a tlawm bik minung 300 renglo lengmang an si.
Falam ah Dr. Za Hlei Thang ruak vuinak kong he pehtlai in Chinland Herald in Chief Editor a simi le Dr. Za Hlei Thang ruak bultawlnak ah tuanvo ngeitu pakhat a simi Salai Hngepi nih a tu bantuk in The Chinland Post ah a chim.
“Dr. Za Hlei Thang ruak cu tuzanlei suimilam 3:00 tluk ahkhan Falam an rak phakpi cang. Atu hi Falam Town Hall ah a ruak cu zankhuadei suan a si lai. May 5, suimilam 10:00 in Falam Baptist Church (FBC) ah a ruak kalpi in thlahnak caanhman a si lai. Chin ramkulh Chief Minister Salai Lian Luai le CNF in Dr. Salai Lian Hmung Sakhong nih special biachimnak an ngeih lai i Rev. Dr. Law Ha Ling nih thawngthabia (sermon) chimnak a ngeih lai.”
“FBC i caanhmaannak a dih hnu ah CNF/A phungning in a ruak cu thlan lei ah an kalpi lai i Khrihfa biaknak phung ning in vui a si te lai. Chin pasaltha Dr. Za Hlei Thang ruak donnak le thlahnak caah Siakawng pathum le vok paruk kan thah lai” tiah a biapeh ah a chimchih.
1990 kum ah Chin ramkulh Falam peng in Pyithu hluttaw MP le CNF ah former chairman a simi Dr. Za Hlei Thang cu US ram Maryland State, March 17 zanlei suimilaam 1:34 ah khan cuap lei zawtnak in mual a liam.
Dr. Za Hlei Thang cu 1943 kum April 6, Falam peng Tlauhmun khua ah a chuak i a thih ah kum 75 a tling. Yangon ah tanghra a dih, tanghra a dih nak hmun ah hin a mah tel in minung 3 lawng nih sii lei kainak Doctor an rak kai kho. Salai Tin Maung Oo nih Chin Literature & Cultural Committee ah a sawm i a rak lut. Tlawmpal ah ralkap nih Salai Tin Maung Oo cu an rak tlaih i cu lioah Dr. Za Hlei Thang hi a inn in chuak ngam lo in sau nawn a rak i thup. Dr. Za Hlei Thang a nupi cu Sayamah Ni Dong a si. Fanu Dr. Milan Za le fapa San Oo Za a ngeih hna.
“Dr. Za Hlei Thang hi sianghngakchia a rak si lio te in miphun dirkamhnak ah hmaisuang a rak si zungzal. Ne Win cozah nih saupi thong an rak thlak. A chuah hnu ah sianginn a peh than i Siibawi rian a tuan. 1990 thimnak lio ah Falam peng in MP a tling mi asi. SLORC ralkap cozah nih tlaih an timh caah ramleng ah a rak chuak mi asi. 1994 kum Marnepalaw KNU hmunlipi ah kan rak ihmu hmasa bik. Mah hnu cun 1998 Ottawa Chin seminar ah kan i tong than. 2011 CNF conference ning in 2012 thok in hmasabik Supreme Council Chairman a tuanmi asi. Amah a tuan lio ah CNF le Kawl cozah ahmasa bik chawnhbiaknak an thawk asi. Mi nunnem, miphun daw, pa chuakthiam asi” tiah CHRO in Executive Director Salai Bawi Lian Mang nih a facebook ah a tial.
Dr. Za Hlei Thang nih a nun lioah CNF (Chin National Front) a luhnak kong he pehtlai in tampi soisel a rak tong bal. Cu i a chim tawnmi cu “Chin miphun a huap khomi cu CNF lawng hi an si. Falam pawl nih ‘ziang ruangah CNF, Halkha hnen na lut, titsa phoh’ tiah an kan ti. Nain kei nih CNF ka luh hi titsa phoh ah ka ruat lo. CNF hi Hakah ca lawng dirhmi sisehlaw ka lut hnga lo. Falam ca lawng sisehlaw ka hei lut hlei hnga lo. Chinmi miphun dihlak an kan huap khomi a si caah ka luhmi a si” tiah a rak chim.
Dr. Za Hlei Thang ruak Chinram a phak khawh nakding caah hin $25000 tluk a herh i cu zong cu CNF nih US ram Chin khrihfabu kip sinah tlawm an hal hna tiah kan theih.
About The Author
