Dr. Za Hlei Thang Ruak Tuzan Kalay Ah Riahpi In May 5 Falam Ah An Vui Lai

0

City Hunter| 2018 May 3| CNF (Chin National Front) hruaitu hlun Dr. Za Hlei Thang ruak cu May 2 zan ah Myanmar ram an phakpi cang i May 3 zan Kalay ah a ruak riahpi in May 5 (zarhte ni), Falam ah an vui lai tiah kan theih.

Dr. Za Hlei Thang

Chin World ah riantuantu Salai C. Lian nih, “Dr. Za Hlei Thang ruak cu tu zanlei suimilam 5:00-7:00pm kar ah Kalay an rak phakpi lai. LBA le El Bethel Baptist Church tawlrelnak in a ruak don a si lai. Tuzan hi Kalay, Bethel Theological Seminary ah a ruak riahpi a si lai i May 4 zingka ah Kalay in Falam ah an kaipi than lai” tiah The Chinland Post ah a chim.

CNF hruaitu hlun Former Chairman a simi Dr. Za Hlei Thang ruak cu May 2 zan, suimilam 10:15 ah Yangon International Airport an phakpi. Miruak chuahpinak Ngyaungpin gate in suimilam 11:00pm tluk ah an chuahpi. Cuka cun ruak donnak, upat peknak le caanhmaannak cu suimilam 12:00 tiang an ngei kho. Falam Sianghleirun, Zahau (Falam), All Chin Society, CLD, CNF palai hna nih biatawi chimnak, upat peknak le philhlonak roca (trophy) peknak an ngeih. Hi zan ah Dr. Za Hlei Thang ruak a dongtu zapi hi 300 hrawng an si. Zan suimilam 12:30 ah Yangon in Kalay lei ah motor in an rak i thawh than tiah The Chinland Post Editor Salai Bawi Uk Thang sin in kan theih.

Yangon ah a ruak donnak le thlahnak tuah lio/Photo: TCP

Falam ah Dr. Za Hlei Thang ruak vuinak kong he pehtlai in Chinland Herald in Chief Editor a simi le Dr. Za Hlei Thang ruak bultawlnak ah tuanvo ngeitu pakhat a simi Salai Hngepi nih a tu bantuk in The Chinland Post ah a chim.

“Dr. Za Hlei Thang ruak cu May 4 zingka ah Kalay in an rak kai pi lai i suimilam 3:00 hrawng ah Falam Town Hall in donnak tuah a si lai. May 4 zan cu Falam Town Hall ah a ruak suan a si lai. May 5, suimilam 10:00 in Falam Baptist Church (FBC) ah a ruak kalpi in thlahnak caanhman a si lai. Chin ramkulh Chief Minister Salai Lian Luai le CNF in Dr. Salai Lian Hmung Sakhong nih biatawi chimnak an ngeih lai i Rev. Dr. Law Ha Ling nih thawngthabia (sermon) chimnak a ngeih lai. Cu khawh cun anmah CNF/A phungning in a ruak cu thlan lei ah an kalpi lai i vui a si te lai.”

Yangon ah a ruak donnak le thlahnak tuah lio/Photo: TCP

1990 kum ah Chin ramkulh Falam peng in Pyithu hluttaw MP le CNF ah former chairman a simi Dr. Za Hlei Thang cu US ram Maryland State, March 17 zanlei suimilaam 1:34 ah khan cuap lei zawtnak in mual a liam.

Dr. Za Hlei Thang cu 1943 kum April 6, Falam peng Tlauhmun khua ah a chuak i a thih ah kum 75 a tling. Yangon ah tanghra a dih, tanghra a dih nak hmun ah hin a mah tel in minung 3 lawng nih sii lei kainak Doctor an rak kai kho. Salai Tin Maung Oo nih Chin Literature & Cultural Committee ah a sawm i a rak lut. Tlawmpal ah ralkap nih Salai Tin Maung Oo cu an rak tlaih i cu lioah Dr. Za Hlei Thang hi a inn in chuak ngam lo in sau nawn a rak i thup. Dr. Za Hlei Thang a nupi cu Sayamah Ni Dong a si. Fanu Dr. Milan Za le fapa San Oo Za a ngeih hna.

“Dr. Za Hlei Thang hi sianghngakchia a rak si lio te in miphun dirkamhnak ah hmaisuang a rak si zungzal. Ne Win cozah nih saupi thong an rak thlak. A chuah hnu ah sianginn a peh than i Siibawi rian a tuan. 1990 thimnak lio ah Falam peng in MP a tling mi asi. SLORC ralkap cozah nih tlaih an timh caah ramleng ah a rak chuak mi asi. 1994 kum Marnepalaw KNU hmunlipi ah kan rak ihmu hmasa bik. Mah hnu cun 1998 Ottawa Chin seminar ah kan i tong than. 2011 CNF conference ning in 2012 thok in hmasabik Supreme Council Chairman a tuanmi asi. Amah a tuan lio ah CNF le Kawl cozah ahmasa bik chawnhbiaknak an thawk asi. Mi nunnem, miphun daw, pa chuakthiam asi” tiah CHRO in Executive Director Salai Bawi Lian Mang nih a facebook ah a tial.

Dr. Za Hlei Thang nih a nun lioah CNF (Chin National Front) a luhnak kong he pehtlai in tampi soisel a rak tong bal. Cu i a chim tawnmi cu “Chin miphun a huap khomi cu CNF lawng hi an si. Falam pawl nih ‘ziang ruangah CNF, Halkha hnen na lut, titsa phoh’ tiah an kan ti. Nain kei nih CNF ka luh hi titsa phoh ah ka ruat lo. CNF hi Hakah ca lawng dirhmi sisehlaw ka lut hnga lo. Falam ca lawng sisehlaw ka hei lut hlei hnga lo. Chinmi miphun dihlak an kan huap khomi a si caah ka luhmi a si” tiah a rak chim.

Dr. Za Hlei Thang ruak Chin ram a phak khawh nakding caah hin $25000 tluk a herh i cu zong cu CNF nih US ram Chin khrihfabu kip sinah tlawm an hal hna tiah kan theih.

About The Author

Na ruahning rak langhter ve.. (Leave a comment)

%d bloggers like this: