Duhnak Langhter Ruang Siangngakchia Barmi Minung 40 Leng An Si Cang
TCP-Online| 2018 January 29| Kawlram fimcawnnak tangkaa (Budget) tam deuh suaisam dingin siangngakchia nih an hal ruangah minung 40 leng sianginn in chuah an simi hi ramkomh cozah lei nih zaukphung a kalpi tak lo ruang a si tiah Kawlram siangngakchia dihlak ikomhnak bu nih an chim.
Kawlram fimcawnnak lei aa thlennak ding ca le zaukphung he aa tlakmi fimcawnnak a si khawh nakding siangngakchia nih an duhnak phun 11 an hal. Mah hi phun 11 cu Hluttaw lei zong nih a rannak in ceih dingah duhnak an langhter.
Tukum January 22 ni khan Mandalay Yadanarpong University ah a kaimi siangngakchia hna hruainak in duhnak an rak langhter. Hiti duhnak an langhter ruang ah a dang ramkulh le ramthen sianghleiruun kaimi siangngakchia zong nih duhnak an langhter ve. Cuticun, January 26 ni thok in ralkap cozah nih an tlaih kham hna tikah tu ah cun minung 40 leng sianginn kai/peh ko ti lo ding nawl an chuah cang.
‘Siangngakchia duhnak langhtermi, sianguk lei nih an barmi hi cozah thar nih kan ram fimcawnnak kong zeiah a rel lo ruang a si’ ti zong Kawlram chung sianghleiruun a kaimi siangngakchia bu nih an chim.
“Siangngakchia nih kan hla cemmi cu kan ram chung fimcawnnak ca Budget an chiahmi hi karh ter deuh ding le President Thein Sein cozah chan ah siangngakchia nih lamzawh nih duhnak an rak langhtermi fimcawnnak kong phun 11 zong tlinter ding hi a si. Mahti duhnak kan langhter ruang i sianginn kai ding tiang an ka barmi cu a phung zong si lo. Tukum hrimhrim ah hiti an barmi siangngakchia zong sianginn tha tein an kai khawhnak ding ca kan i zuam lai” tiah Kawlram chung sianghleiruun komhnak bu ah Secretary simi Kaung Htet Aung nih a chim.
Duhnak langhter ruang hi siangngakchia minung 40 leng cu 2018-19 kum sianginn kai dingin an bar cang hna tikah an sianginn kainak siang cachim pawl zong siangngakchia lei nih cun an nawl len hna ti theih a si.
Ref; VOA
About The Author
