Editor Cakuat| Zohchuntlak Chin/Lai Mino Lg Tuan Kil Tang

TCP-Hakha| 2020 May 10| Khuazaa ram khuasa Chin/Lai Miphun hawi hna nan sinah lunglawmhnak chim khawh lo thawng kan thanh hna.
Nihin ni kan Vawlei dirhmun ruah tikah Vawlei chung mi vialte thinphang thlalau in an kan tuahtu Covid – 19 cu Mirum mi sifak, Mifim le mi hruat, Bawi le chia zong thleidang loin a mikip sinah a phan kho mi le a mikip nih ttih cio mi dirhmun in kan um lio caan ah mipi hna cu an herh ning le an dirhmun zohin Cozah nih anmah le sining cio in zohkhenh le bawmhnak tuah cio a si. Covid – 19 dohnak caah Lockdown antuah i cuticun doh le hrial cio kha a si.

Cu ve bantuk in kanram le kan Miphun dothlennak rian a ttuan cuahmah mi CNF/A zong nih zeidang vialte nakin Covid – 19 dohnak hi nai March Conference ah biachahnak ngeih in hmalak a si ve. CNF/A cu bawmtu le hramtu ngei loin cuticun thing le ramtang ah anmah tein khua awka ngai in Covid – 19 cu doh a si caah mipi hna nih Chinland Club nanpek mi tein Facang, Chiti le Cite cu khuattan in pek ansi i zeidang mehmua le tihang cu mahte in ramtang ah luhin i kawl cio a si. Caan zei caan a raoh lai i zeitik ahdah mipi zalawng tein kan cawlcangh khawh te lai timi cu vanzoh in um a si. An pawngkam Tio tiva tlawng hna le Hmawngtang um anhringso nih a zat cawk te hna lai maw ti ruah ah ruahnak nih a phan kho lo.

Cu an dirhmun cu Denmark ram Varde khua i khua a sa mi Pu Thwng Bil le Pi Hoi Thai Tlangrau. Tantlang peng hna i an fanu Lg. Tuan Kil Tang nih Camp Victoria i nu le Ngakchia hna hi minung fa ve lo bang miphung ruagah hi dirhmun an dir cu kazoh kho hna lo, ankong karuah ah kalung a faktuk kannih cu nu le pa he ramrum le ramttha ah khua kansa hna tiah Sianginn kai lio mi Cozah bawmhnak Phaisa te cu hmang sianlo in aikhon i CNF/A Nu le Ngakchia Covid – 19 dohnak caah tiah Kawl Phaisa in Singhra (1,000,000.00)Ks cu a kuat cang i Hakha a phan cang. Hi kan fanu Lg. Tuan Kil Tang khuaruah mi le lungput nih kathinlung mei bangin akangh ko. A tu lio dirhmun kanton lio ah a ho mizei thinlung le hmurka in tutan kongah a chuak rih lo ti ahcun kapalh thlu lo men lai. Mino te a si i a duhherh tampi a um ko lai nain cu vial tecu ruat loin hizat a van chuah ko cu khuaruahhar khi a si ko.

Cucaah khuazaa um miphun hawi hna Pumpak in siseh Khrihfabu in siseh Bu le tlang in siseh tu lio CNF/A dirhmun hi kancuanh cio awk ah ka duh ngaingai. Tulio kan dirhmun hi Hakha, Thantlang, Falam, Tidim Thlanglei le Chahlei ti um hlahseh kan Vawlei pi zomng thar lengmang le lau lengmang in a tuah tu Covid – 19 dohding in lungkhat tein an um ve bantuk in kan Chinland le kan Chinram humhimnak caah rian a ttuan mi kan Miphun hawi CNF/A zong Camp Victoria cu Lockdown tuah a si ve caah hi lio caan te caah nasi khawhtawk te kha a herhtuk lio caan a si. Acunglei kattial cia bang Cozah bawmhnak a hmuding le a temding ansi lo, kanmah Chin/Lai mi nangmah le keimah dah tilo bochan ding le ruahchan ding dang a um lo. Hi zawtnak hi kanram caah kanmah ttuanvo a si i kan Miphun himnak caah kanmah ttuanvo a si ti ruat hram ko hna usih law CNF/A Covid – 19 dohnak caah tiin nankut van samh cio tuah u tiah sawmchih ka van induh ko hna.
Za Awi Thang
CNFRC
Denmark