Editor sin cakuat: Civil Disobedience Movement

1

Khrihfa mi nih a dik lo mi kong ah duh lonak an rak langhter mi ah hin Rawl Ulhnak hi a si ve. Israel mi nih an rak hman mi a si.

Israel mi cu Cozah nih hramhram in siasal a biakter hna ah maw, thah a timh hna ah maw duh lonak an rak langhter. Rawl an ul. Buri an i khuh. Vutcam an i phulh i an tap an au i thla an rak cam. Cuticun, Cozah cung ah duh lonak an rak langhter.

Nebukkhanezar cozah ah khan Daniel le a hawile nih rawl an rak nuar. Esther siangpahrangnu chan ah khan ni thum chung rawlulh in miphun ning in thla an rak cam.

A dang pakhat cu, C. E. 26 ah khan Pontius Pilat nih Caesar milem cu Jerusalem khua chung ah ka dirter lai tiah nawl a rak chuah. Judah mi upa nih an rak nawl. Nain Pilat nih a duh lo. Nan duh lo ahcun kan thah hna lai tiah a rak tlerh hna. Cu tikah Judah mi nih cun Milem ser i Jerusalem khua chung ah chiah nakin cun kan that ko u tiah an rak ti hna. Duh lonak an rak langhter.

Cucaah tutan Ralkap nih uknak an chuh mi kong ah Khrihfa mi nih hitihin duh lonak langhter ve hna usih tiah a tanglei ruahnak pawl ka hun tlar:

1. Hakha ning in Ni 7 chung zanlei fatinte rawlulh tinak tuah. Rawl ulh tikah a caan i khat tein tuah khawh ahcun hmual a ngei deuh lai. Khuapi ning in inn hmai ah chuah cio i pher i phah in rawl ulh thlacamnak ngeih cio ding. Tahchunhnak ah, zanlei sml. 1 in 3 tiang mah le inn hmai cio chuah i puanlu i khuh in rawl ulh thlacamnak ngeih. Hihi Ralkap caah thil thar a si lai caah hmual a ngei kho. Biaknak lei hruaitu kan pastorte nih an kan hruai ah cun a tlamtling kho bik hnga.

2. A dang, zapi zaran le pum pawcawm nak ah kawl hawl mi nih, Hakha ning in Ni 7 chung (asiloah Ni 14 chung) zanlei fatinte dawr khar dih. Pawcawmnak caah dawr a tuah mi kan si caah nikhat chung dawr khar cu a har kho men. Cucaah zanlei 1 in 5 tiang dawr khar lengmang. Ni 7 chung khar ahcun hmual a ngei kho. Hihi cu zapi tein lungkhat tein kan tuah khawh mi a si.

Hiti duh lo nak langhter ning hi thil thar a si lai caah Kawlram pi theih in a aw a thang kho mi a si. Miphun tlawm kan si ko nain kan thil ti mi nih mi a hip khawh ko hna lai ti ruahchannak he…

Upatnak he,
Laihlum, Hakha
2020 February 4

About The Author

1 thought on “Editor sin cakuat: Civil Disobedience Movement

Na ruahning rak langhter ve.. (Leave a comment)

%d bloggers like this: