Editor Sin Cakuat; Hakha Sii-inn Ah Ka Siaherhnak Part II

0

The Chinland Post| 2018 June 6| Hakha Sii-inn ah a poi ka ti rih mi pakhat cu Radiology leiin Ultrasound thlaknak kongkau ah a si. Ultrasound thlatu hi (Dr. Zing Hlawn Sung-min hi ka palh kho) lawng a um. Amah pakhat lawng a si caah a zaw ve khomi le aa manhlo kho ve mi a si caah, amah a kai lo ahcun Ultrasound thlak khawh a si ti ve lo.

Nizan (June 5) ah mizaw a zualhma deuhmi an um caah a rannak in ultrasound va i tuah uh tiah Special Room ah ummi mizaw cu an kalter tikah Dr. nu cu khawnh a hal i a kai lo caah nan kir a hau ko ti a si. Mizaw kha Epigastric pain le abdomen pain a si tikah a hrum-ai thluahmah. Pakhat nu nih a ka chimhmi cu voikhat sii-inn kan kai i USG thlakding an kan ti i kan kal nain a tuahtu Dr. cu khawnh a lak i nithum tiang a kai ti lo caah nithum chung rethei ngai in kan hngah e tiah a ka ti.

Cucaah dam lo le manhlo hi ni zeizat ti chimh awk a that lo caah USG ah pakhat lawngin um hi anmah ca zong a har an ti lai bantukin mizaw ca zong ah a poi an ti cio. Ka chim duhmi cu anmah kha sualphawtnak pakhat hmanh ka chim duhmi silo in, Ultrasound tuahtu pakhat lawng a si tikah a re zong a thei tuk lai bantukin a dam lo le a kai khawh lo lioah Emerency or serious patient caah cun zaangfak khi an si ve.

Ultrasound (USG) an i tuah khawh lo tikah an zawtnak result zoh awk a thatlonak tete a um caah a poi ngai ka ti. HAKHA cu Chinram khualipi a si tikah mizaw an tam. Zualhma mizaw zong an tam deuh tikah Radiology ah Investigation tuah Lab ah blood test, urine acid tuah pawl an tam tikah a hlei in re a thei caah rianttuantu hi tam deuh kho hna sehlaw mizaw ca zongah a tha tuk hnga. Cucaah, hi kong hi Chinram cozah le tuanvo ngeitu upa hna nih Chin mizapi le mizaw hna zawnruah le dawtnak he rianrang in a kan tawlrelpiak a herhnak kong zapi sin ah ka saduhthah bia ka van langhter.

Catialtu
Salai Za Thawng
2018 June 6

Biakilh: Hi cabia cu Salai Za Thawng nih Editor cakuat in The Chinland Post ah a kan kuatmi cabia a si.

About The Author

Na ruahning rak langhter ve.. (Leave a comment)

%d bloggers like this: