Ekah 676 Samh Dingmi Ram Kong Ah Pu Khua Kung Nih Cozah Sin Ah Zeitindah A Fianter?

0

Catialtu Pu Khua Kung

The Chinland Post| 2019 August 20| Hakha ramuk bawi le panglong biahrennak minthu mi ah aa tel vemi Pu Kio Mang fapa Pu Khua Kung nih ekah 676 samh dingmi hmun kong ah cozah sin i thil sining a fianhmi kong The Chinland Post nih biaruahnak kan ngeihnak ah atanglei bantuk in thil sining a fianter.

Cozah nih pengkomh zung ah an auh i pupa ram hi a um maw tiah an hal?

Pu Khua Kung nih Hakha ahhin pupa ram timi hi a um bakmi a si ko.  Cun, pupa ram a ngeimi hna hi Sangpi, Sangte, Khenglawt le Thlaceu kan si. A dang zong an ngei cio ko lai nain atu i ka chimmi hna hi ram  tambik ngei an si. Cun, midang zong   ram ngeitu an um cio ko lai, a cheu cu aa cawmi an si lai, aa zuarmi zong an um lai. Ni man, far man le kalhmi ram zong an lai. Cun, a phungningte in roco mi ram zong an um lai tiah a leh hna.

Hiti biahalnak an tuah cu March 15 hlan deuh ah a si. Cu dih hnu March 15 ah atu ekah 676 samh dingmi hmun ah an kalpi.

Cu tikah Pu Khua Kung nih cun, Ka pa Pu Kio Mang, Pu Sang Thul le a dangdang nih an rak ka chimhmi cu; Nawi tlang ram vialte hi tlangram a si. Mahka khin private ram aum lo a kan ti. Tlangram chung ah pumpak ram um phung a si lo. Cun, pupa ram a umnak ah tlangram a um ve lai lo e ka ti hna.  Cun, hika zawn i ram kan ngei tiah aa timi hna vialte hi nizan tihni ah aa cawmi hna an si lai. An i cawk tikah hin a fekmi tette tha he aa cawmi an si ahcun acozah nih liamrulhnak nan pek hna lai i cuti nan pek hna hnu ah acozah nih a herhnak paoh ah nan hman khawh lai.  Cun, mahka tlangram ahhin an i cawkzuarnak tette thate in zohfel u law a dik lomi paoh cu acozah nih a herhnak paoh in nan hman khawh.

Cun kan kal than i Tei Vak thlaam kan phan. Mahka hi zeiti a kan ti?

Mahka hi Tei Vak thlam a si, Tei Vak hi satil tampi a ngeimi a si. Hakah Khuahlun ah inntang ah satil chiah awk athat lo caah hika tlangram ah a ra i a satil he khua a sa. Cun, lei zong a thuang. Mah Tei Vak thlaam hi kanmah kan tlanval lio te in Nawi ah ngahring kan dawi le kan lenvah ahhin a rak um zungzal cangmi a si. Cun, nihin ni tiang in a tefa hna nih pehzulh in an zoh i an lei kha an thuan ko ahcun acozah nih letmah pakhat zong nan laakpiak hna  lai lo. Cun, acunglei ah Men Caan nu le pa zong an um i anmah zong hi ahlan te in lo a rak thlomi an si. Mah hna cu an tefa hna nih an vawlei an tuan ko ahcun letmah pakhat zong nan laakpiak hna lai lo. Tei Vak hi a ramri a bitkauh ka hngal lo. Asinain, atu hi thlaam aa sami khi a caw inn le a rang umnak an si ko ka ti hna.

Kan tlanval lio ah hika tlangram ahhin inn aa sami a um lo. Cucaah, acozah nih lam nan chunh lai in maw, nan chunh hnu ah maw atu inn pawl khi an sakmi an si lai. Cu nih a langhtermi cu tlangram taktak a rak sinak kha a fianter. Tlangram si  lo in pumpak ram rak siseh law an rak um dih cang lai. Mahka i a ummi le inn a sami vialte hi acozah nih thate in thil sining nan hal dih hna lai. Tette thate  in a n geimi cu acozah nih liamrulhnak nan pek hna  lai.

Cun kan kal i Nawi tiva kan phan. Mahka hi Hakha pi kan fim hlan ah Cia Dun le Hrang Vung hi a fim hmasa an si. Kan ngakchiat lio te in mahka hi lei a rak thuang hmasa bikmi an si. Cuti an thuannak zong cu pupa ram si loin tlangram a si ko. Mahka an thuannak cu nihin ni tiang an tefa hna nih an thuan ahcun acozah nih letmah pakhat zong nan tonghpiak hna lai lo.

Cun, a chak ah lei pakhat a um i cuka lei a umnak cun lam ser kan duh a k an ti. Cu tikah cuti lam ser nan duh ahcun thate in nan nawl lai i nan simanking kha thate in nan chimh lai. Atu Hakha College umnak khi a zapi te in tlangram thiamthiam a si. Khika khi a min ah Cerhpar Va kan ti. Mah Cerhpar va kam i lei aa thuangmi khi kan Pu Thawng Zam lei a rak si. Thawng Zam zong cu a pupa ram a si lo, a fim ve caah a rak tuah vemi a si. Cucaah, nihin ni tiang a tefa hna nih an tuan ahcun acozah nih nan chuh awk le nan tonghpiak ve awk a si lai lo. An thuan lo belte ahcun cozah nih a herhning in nan hman awk a si ko ka ti hna.

“Acozah nihhin ram pakhat ser nan duh tikah a cunglei in Vom nam in nan nam hna awk a si lo. Atak tak ahcun Hakha Khuathar zong hi innhmun kan samh lai, hiti hin simanking kan ngei. A herh si ahcun liamrulhnak zong kan in pek ko hna lai tiah thate in rak nawl, rak lengkai hna hnu u law zei paoh te hi a tluang ko hnga” tiah Pu Zo Bawi kha a zung ah ka chimh.

Cucaah, acozah nih ram pakhat ser nan duh tikah khuami, sangmi le hmun ngeitu hna kha thate le nemte in nan chawnhbiak hmasa lengmang hna awk a si. Nan i tinhmi kha nan simanking kha thate in chimhruah hna u law a herh ahcun liamrulhnak kan in pek hna lai ti hna u law zei paoh a tluang ko lai. Cu bantuk in ram ngeitu hna zong nih ka ram a si, ka dum a si ti fek tuk i tlaih ve lo ah a tha. Acozah nih ram ngeitu hi thate in an nawl i an simanking an chimh hna ahcun an hmun le an vawlei hi an sian hrimhrim ko lai ti ka ruah.

Hika ah Interview tuahnak video zoh chap khawh a si.

 

About The Author

Na ruahning rak langhter ve.. (Leave a comment)

%d bloggers like this: