England Le Tunisia An Chuih Hlan Ah Harry Kane Nih Zeibia Dah A Chimtak? (video file)
City Hunter| 2018 June 19| June 19 deilei suimilam 12:30 ah England le Tunisia an chuih i England nih 2-1 in an tei hna. Tunisia he an chuih lai zingka ah England phu in captain zong a si i hmaikal zong a simi Harry Kane biachimmi a tling. Harry Kane nih zeibia dah a chim? A tanglei ah goal an i sutnak pawl a biapitnak minute 4 chung (video high-light) zoh chih khawh a si.
England phu in captain zong a si i an hmaikal zong a simi Harry Kane nih, “Tunisia he chuih ding kaa ngaih tuk cang. Vawleipi hi zeidah ka tuah khawh timi hmuhsak ding kaa hngak kho ti lo, kaa ngaih tuk cang. 2014 World Cup le Euro 2016 zuamnak ah zohdawh lo in England cawlcanghnak vialte dawhte in remhthannak caah Tunisia he kan chuih ahhin vawleipi theih in zeitluk in dah pumpululh chuih ka thiam timi ka hmuhsak lai” tiah Tunisia he an chuih hlan deuh ah a chim.
Tunisia he an chuih minute 11 ah Harry Kane nih goal 1 a khat sut colh. Minute 35 an chuih ah Tunisia lei in penalty an ngah i Ferjani Sassi nih goal 1 a sut ve. Caan a dih laite minute 90 ah Harry Kane nih goal 1 a sut than. Tukum world cup England caah a hmasa bik puai ah Harry Kane nih goal 2 a sut.
Tunisia hi 2010 le 2014 kum ah an chuih lo. England hi 2010 kum round 16 chuih ah Germany nih an thlak hna. 2014 kum ah group chuih in an tla colh. Tunisia le England hi 1998 kum ah an rak i tong bal i England nih 2-0 in an rak tei hna. World Cup thawkka in England hi champion voikhat an co bal ve cang.
England cu June 24 zan 6:30pm ah Panama he an chuih lai i June 29 deilei 12:30am ah Belgium he an chuih than te lai. Group G ah England, Belgium, Panama le Tunisia hi phukhat an si. Group G in England le Belgium he group in an kai te lai tiah vawleicung zaanglekcelh thapetu hna nih an ruahdamh cio.
About The Author
