England Nih Semi Final Tiang Kai In Champion An Co Khawh; Sweden Coach Janne Andersson
City Hunter| 2018 July 8| Quarter final ah England he 2-0 in an sungh hnu ah Sweden Coach Janne Andersson nih England cu a thangthat hna. England hi a tha bikmi an si. Semi final tiang kai in champion an co kho tiah a chim. England nih 2-0 in Sweden an tei hna caah 1990 kum hnu in World Cup ah semi final an kai hmasabik a hung a si.
Sweden he an chuih lio ah England nih 2-0 in an tei hna. England goalbawh hrimhrim a thiam tuk i Sweden he an chuihmi puai caah minthatnak an pek.
World Cup tuanbia zohthan tikah tukum he hin England hi semi final voithum an phan kho cang. Semi final an phak kum cu; 1966, 1990 le tukum 2018 ah a si. England nih World Cup champion voikhat te an co bal, 1966 kum ah. Tukum Semi final an kai hi kum 28 chung ah a hmasa bik semi final an kai a si.
England he an chuih dih hnu ah Sweden coach Janne Andersson nih, “A tha tukmi phu he kan i zuamcawh i a tha bik in kan chuih kho lo. Caantha hrimhrim an kan pe lo. Nihin ah England hi a tha bikmi an si caah ka thangthat hna. Final tiang kai in champion co kho ding tiang an ke a tha” tiah a chim.
Sweden he an chuih dih hnu ah England pumpululh phu an captain Harry Kane nih, “Hmai ah a biapi tukmi semi final puai kan ngei rih timi ka hngalh. Asinain ruahchannak tha kan ngei, i zumhnak zong kan ngei fawn. Hinak fak deuh in kan i zuam lai. Rampi min thatter le cawisan ka duh” tiah a chim.
England phu in captain zong a si i an hmaikal zong a simi Harry Kane nih, “Tukum world cup a hmasa bik Tunisia he an chuih hlan deuh ah pumpululh chuih lai kaa ngaih tuk cang. Vawleipi hi zeidah ka tuah khawh timi hmuhsak ding kaa hngak kho ti lo, kaa ngaih tuk cang. 2014 World Cup le Euro 2016 zuamnak ah zohdawh lo in England cawlcanghnak vialte dawhte in remhthannak caah Tunisia he kan chuih ahhin vawleipi theih in zeitluk in dah pumpululh chuih ka thiam timi ka hmuhsak lai” tiah a chim.
Tunisia he an chuih lio ah England nih 2-1 in an tei hna i Harry Kane nih goal 2 a sut. Tukum World Cup Panama he an chuih lio ah England nih 6-1 in an tei i Harry Kane nih goal 3 in hat-trick a ngah. Tukum World Cup ah a pahnihnak hat-trick a ngahtu zaanglekcelhtu a si. A hmasa bik hat-trick ngahtu cu Portugal in C. Ronaldo a si.
Tukum World Cup ah goal tambik a suttu cu England in Harry Kane a si, goal 6 a ngei cang. Amah hi sui kedan co khotu ding ah zumh bikmi a hung si cang. Midang cu a tam bik goal 4 lawng an ngei rih.
England le Croatia cu Kawlram caan in July 12 deilei (July 11 zan) suimilam 12:30 ah semi final an chuih lai. Teinak a hmutu paoh final an kai lai. Cu bantuk in France le Belgium zong July 11 deilei (July 10 zan) suimilam 12:30 ah semi final an chuih ve lai i teinak hmutu paoh final an kai ve lai.
Ref: FIFA, 7Day News
About The Author
