EU Nih Myanmar Ralkap Lutlai 5 Le Palek Lutlai 2 Dantat Phihkharnak A Tuah Hna

0

City Hunter| 2018 June 26| EU (European Union) nih Rakhine ramkulh ah rian a tuanmi ralkap lutlai minung 5 le humhimnak lei riantuantu palek lutlai pahnih cu Muslim (Bengali) cung i timhciammamte in nuhrin covo buarnak an tuah ruang ah tiin dantat phihkharnak kan tuah hna tiah June 25 ah an thanhchuah.

Dantat phihkharmi ralkap lutlai 5 cu; Runvennak ministry zung in No.3 special bu- kah-sah-htah-3 rian a tuanmi a pahnihnak bogyoke-gyi Aung Kyaw Zaw, nitlak ramthen zungpi in lutlai zik hlun Bogyoke Maung Maung Soe, Tatmah No.99 lutlai Bohmu-gyoke Taan Oo, Tatmah No.33 lutlai Bohmu-gyoke Aung Aung, No.15 ralkap bu lutlai Bogyoke Khin Maung Soe an si. Hi pin ah ramri humhimnak lei tuanvo latu phu in Palek bu Thura San Lwin (ye-hmu-choh) le No.8 humhimnak palek bawi Thant Zin Oo (ye-hmu-gyi) zong an i tel chih.

Mah dantatmi minung 7 cu EU chungtel ram paoh ah an tlawng kho ti lai lo. EU chungtel ram ah an ngeihmi thilri le chawva (bank i an apmi le an i chiahmi chawva) a um sual si cun phihkhar piak dih an si cang lai. Hi cathanh cu Luxembourg i tuahmi EU chungtel ramleng vuanci pawl tonpumhnak a dih hnu ah zapi hnatlak minthut in an thanhchuahmi a si. EU ram chungtel zapi hi ram 28 an si.

Cu pin ah ralkap lei thawngdik thanhtu phu zong nih ‘2017 August 25 Rakhine ramkulh chung ARSA Bengali phu buainak cung i a tlangtlakning a thader caah ralkal lei kongkau dantatnak zong’ June 25 ah an thanhchih.

Rakhine ramkulh remdaihnak ding tawlrelnak i a thader caah 2017 November 10 ah cangkep cazin ah khumhmi Bogyoke Maung Maung Soe cu June 25 ah ralkap in an chuahnak kong cathanh ah an langhter chih.

Rakhine ramkulh humhimnak he pehtlai in Bogyoke Maung Maung Soe tuahtuanmi thadernak a um tiah a riantuanmi an dinhternak kong 2018 March 6 ah ralkap lei thawngdik thanhtu phu nih an thanh fawn.

Cu bantuk in a pahnihnak Bogyoke-gyi Aung Kyaw Zaw zong tuanvo pekmi a ngandamlonak ruang i a tlolhmi le a tlamtlinh lomi ruang ah amah lungtho te in rian phuahnak ca a tial i 2018 May 22 ah kan cohlan tiah ralkap lei thawngdik thanhtu phu cathanhmi chuahmi ah an telhchih.
Ref: 7Day Daily, RFA

About The Author

Na ruahning rak langhter ve.. (Leave a comment)

%d bloggers like this: