Facang phormi WFP mawtaw Sami-Paletwa kar ah an kah

Salai Tluang Kip Thang| 2020 April 29 zaanlei sml. 3 tluk in World Food Program (WFP) nih AA le Kawl Ralkap kahnak ruang ah Paletwa peng hartongmi hna caah facang tun 1000 cu Sami in an kalpi nain, meng 12 fai an phanh ah meithal in kah a tong tiah theih a si.

“WFP mawtaw hi Sami ah zaan 2 an riak. Facang hi dip 1,000 an phor i 29 April zaanlei 3:50 tluk ah Sami in Paletwa lei ah an i thawh. Nain, Paletwa an phanh hlan lam tan tim ah meithal in kah a tong” tiah min langhter awk tha lomi nih the Chinland Post ah a chim.

Sami khuami pakhat nih, meithal kah a ton hi an kal zaan 7 tluk ah a si tiah kan theih. An kahnak hi Sami le Paletwa karlak ah a si i Ye Pian khua an lonh ah a si tiah The Chinland Post sin ah a chim.

A cozah thawngzamhnak simi ‘Taungzalat Time’ nih cun, Ralkap lei nih bomhnak pek ding mi le humhim nak lak ding ah tiah mawtaw 31 in hmailei ah an kal chung. Nain, WFP cu a hnu deuh in mawtaw 5 anmah tein in an kal. Cucu, AA nih WFP mawtaw cu a kah tiah a thanh.

Meithal kah an tonnak ah WFP mawtaw khaltu (mawngtu) hliamhma a tuar tiah theih a si. Cun, an mawtaw cu kal kho lo ding in a hmailei ke kuai ding in an kah tiah theih a si.

“AA nih an kahmi WFP mawtaw mawng hi Pakokku mi U Win Ko a si, hliamma a tuar tiah” Taungzalat Time nih cun a tial.

Rampi huap cozah mirangca in thawngzamhnak a simi, the Global New Light of Myanmar nih cun, April 29 ah Ralkap chungkhar, Ralkap naihniam le INGOs pawl bawmhnak in Facang tun 10,000 bawmhnak Paletwa ah kan pek khawh tiah thawng an thanh.

WFP facang phormi mawtaw cu kah a ton hnu ah, hmailei kal ciami Kawl Ralkap nih cun humhimnak lakpiak ding in a kir hnawh than i, nihin zaanlei suimilam 4 tluk ah Paletwa khuapi an phanhpi lai tiah theih a si.#

Photo: Taungzalat Time/Ralkap Thawngthanhnak

Na ruahning rak langhter ve.. (Leave a comment)

%d bloggers like this: