Falam ah SAC ralkap nih sianginn pawngah aww a thangmi bom an puah
The Chinland Post | 2022 June 21 – Chin ramkulh, Falam khua ah hram a bunhmi Infantry 268 nih Cinmual sang No.2 B.E.H.S pawngah a aww a thangmi bom an puah i CNO/CNDF kha mipi nih phundang in hmu hna seh tiah an tuahmi a si tiah CNO/CNDF nih June 20 ah a thanh.
June 15 ah a cangmi a aww a thangmi bom lengah “Nan fanu le nan fapa ruak pawl char nan duh lo ahcun sianginn karter hna hlah u” timi tlerhnak ca zong aa benh tiah an langhter.
CNO/CNDF nih vawlei cung phung zulh in siahngakchia le sianginn kan hnorsuang lai lo tiah an thanh i CNO/CNDF tuahmi a si hrim lo tiah mipi theihternak a tuah.
June 17 zongah Tlanglo sang ah a ummi No.3 B.E.H.S a hngakmi SAC ralkap anmah le anmah an i kah ruangah ralkap pakhat a hmun ah a thi. Asinain SAC ralkap nih mipi hriamtlai phu nih an kah tiphun in a pawngkam ah meithal puah thlorh in an puah tiah a langhter.
Infantry 268 nih 122 MM in kah thlorh an kah ruangah sualnak ngei lo mipi pakhat a ban ah kuan nih a khen i mipi thilrii cheukhat a rawk, Baila khua mipi inn pakhat zong hriamngan nih a khen i a rawk tiah an thanh.
SAC ralkap nih June 19 zaanlei ah Falam khua an umnak in hriamngan voi 5 hrawng a ruang um loin an kah tiah an langhter.
