Falam-Hakha karlak khuate ralzaam hna an umnak hmun kirṭhan ding ah harnak an tong

The Chinland Post | 2022 July 21 – Chin ramkulh, Falam-Hakha karlak ah SAC ralkap le Chin hriamtlai phufonh hna karlak ah ni 8 chung kahdohnak a chuak i khuami 20,000 hrawng nih innlo an zaamtak. Kahdohnak a daih pah ruangah cheukhat khachung kir ṭhan a si ko nain khuaning in khanghpiak a si caah harnak an tong.

Chin ramkulh, Falam-Hakha karlak lam thluangthluan ah SAC ralkap le Chin hriamtlai phufonh hna cu July 16 tiang kahdohnak a chuak. Ni 8 chung kahdohnak ruangah a pawngkam khuami hna cu himnak hmun ah an zaam. Atulio caan ah kahdohnak a um ti lo nain a zaammi an zapi tein an kir kho rih lo tiah theih a si.

Kahdohnak chungah ralzaam 20,000 hrawng an um. Kahdoh a chuaknak lamcung khuate inn tampi cu khangh a si. Falam peng, Taal khua cu inn 7 lawng a tang. Falam-Hakha lamcung kahdohnak a chuak lioah khuami hna cu a pawngkam himnak hmun ah an i dor chung tiah theih a si.

Chin ramkulh, Falam-Hakha karlak kahdohnak ah SAC ralkap 50 leng an thi, Chin hriamtlai phufonh in 2 an nunnak a liam i 14 nih hliamhma an tuar tiah CJDC biachimnak nawl a ngeitu sin in theih a si.

Na ruahning rak langhter ve.. (Leave a comment)

%d bloggers like this: