Falam- Kalay lam cungah SAC ralkap mawṭaw thluan bom puah hnawh an ton caah a thimi an tam
The Chinland Post | 2022 May 16 – Tank 2 le mawṭaw 26 aa telmi SAC mawṭaw cu Chin ramkulh, Falam in Kalay lei ah 2022 May 9 in an ṭum cang.
Cu mawṭaw thluan cu, May 9 mengtung 63 pawngkam ah an i dinh hnu ah an ke in hmunhma zohfelnak an ngeih lioah CNDF nih bom an puah hnawh hna caah a thimi an tam. Cu SAC ralkap a thimi ruak pawl cu Parte khua inn he an khangh chih hna tiah CNO/CNDF nih May 14 ah a thanh.
SAC ralkap pawl cu, cu hmun in an i thawh ṭhan i mengtung 55 hrawngah bom an i pah ṭhan caah a thimi le hliam a tuarmi an tam tiah theih a si.
Cu lamcung ṭhiamṭhiam i mengtung 45 pawngkam hrawngah CNDF nih bom an puah hnawh ṭhan hna caah 4 an thi i aa hliammi an tam. SAC ralkap pawl cu ramlak lei in an i thawh ṭhan lioah CNDF nih hmanhmi bom an i lamh sual caah a thimi an tam. SAC ralkap nih an tuah tawn ningkhel tein a thimi an hawile ruak pawl cu Zonglei khua mipi inn hna he an khangh chih ṭhan.
Mengtung 63 le mengtung 45 karlak cu CNDF nih hmunhma zohfelnak an ngei i, MA kuan 120, 60 MM kuan 1, kuan bawm 1 an fim khawh lengah nu pawl thilrii hna an hmuh caah mawṭaw chungah ralkap nu pawl an i tel kho men tiah ruahdamh a si.
Kahdohnak vialte chungah, SAC ralkap 12 an thi lai i hliamhma a tuarmi 15 hrawng an si tlai tiah CNDF thawngthanhnak in theih a si.
About The Author
