Falam Khua Ah Chin Kumthar(THO) Puai Phun Hnih An Tuah

Hualngo Mim Kut Puai/ fb

Salai Elvis|2019 Tho 21| Falam khua ah 2019 Ocober thla chungah Chin kum thar he aa pehtlai mi puai phun hnih an tuah tiah kan theih.

October 14 ni ah Hualngo Literature and Culture Association hruainak in ‘MIM KUT’ timi kumthar puai tuah a si i October 19 ni ah Zahau tefa hna i kumthar ‘FANG ER’ zong an tuah than.

Kum thar phun khat a si mi‘MIM KUT’ puai ni ah Hualngo tefa chungin Degree la mi hna le tanghra awng mi hna cu lunglawmhnak roca peknak zong an ngei hna. Mah ni ah Pu Sai Lian Ceua nih ‘MIM KUT’ a rak i thok ning cang chimrelnak le Pu Thang Cuana le Hran Kam hna nih biachimnak zong an ngei hna.

Mah ni ah Hualngo mino hna nih Hualngo lam, hlasaknak in can an hmang hna. Hualngo tefa hna nih tuah mi ‘MIN KUT’ puai cu Falam khau ah 2017 kum in rak tuah a si i a tu kum in a kum thumnak an tuah a si cang tiah kan theih.

Cu bantuk in Zahau tefa hna nih tuah mi ‘FANG ER’ puai zong ah Pu Hrang Tin Duh nih hi puai aa thoknak tuanbia chimnak le, Chief Minister Salai Lian Luai, ramkulh cazin cheknak zung lutlai Lal Tin Mang le Hluttaw palai Pu Zung Hlei Thang hna nih biachimnak an ngei hna. Mah ni ah Zahau tefa hna nih an lam, an hla le an thilthuam tibantuk hmuhsaknak zong an ngei.

Atubantuk in Chin Kum Thar cu Falam khuachung lawng si lo in khuate lei tiang zong nih sunhsak ngai in tuah cio a si. Falam khua chung ah mah le phun cio nih kawh-auh ningin Chin Kum Thar puai cu hman cio a si bantuk in le Thlanglei laitlang telh in Tedim, Falam, Hakha, Thantlang zong nih an mah lei kawh-auh ning cio in October thla chungah Chin Kum Thar (THO) puai cu tuah cio a si. (Ref:iprd Falam)

 

Na ruahning rak langhter ve.. (Leave a comment)

%d bloggers like this: