Falam peng ah kahdohnak a chuak ṭhan, SAC ralkap an thi chap
The Chinland Post| 2022 November 24 – Chin ramkulh, Falam peng ah kahdohnak a chuah ṭhan caah SAC ralkap 1 a thi chap i 2 an i hliam tiah CNO/CNDF nih a thanh.
November 23 zinglei sml 11:45am ah Falam peng, Tibual khua SAC ralkap sakhaan ah a um mi SAC ralkap pawl le CNDF hriamtlai phufonh kahdohnak a chuah ṭhan hi a si i SAC ralkap 1 a thi tiah an thanh.
November 22 zinglei sml 7:00am in zaan 8:00pm tiang kahdohnak voihnih a chuak i SAC ralkap 2 an i hliam tiah a thanh.
November 21 chun sml 2:00pm hrawng zong ah SAC ralkap le CNDF karlak ah kahdohnak a chuak i CNDF hriamtlai 1 fak tuk lo in aa hliam tiah theih a si.
Cun, SAC ralkap nih an kah mi hriamngan ruang ah Tibual khua mipi inn 3 a kaang tiah an thanh.
November 15 thok in Tibual khua SAC ralkap sakhaan cu CNDF phufonh nih an kah hna i SAC nih sakhaan an sungh lo nak hnga vanlei in kahdohnak fak pi in a bawmh i atutiang kahdohnak a chuah hi a si.
November 15-19 tiang kahdohnak chung ah CNDF nih Tibual khua SAC ralkap sakhaan cu Drone in voi 300 leng bom an thlak i kahdohnak chung ah SAC ralkap 30 leng an thi tiah thawng theih a si.
About The Author
