Falam peng, Rihkhawdar khua ah kahdohnak a chuak, SAC ralkap 3 an thi
The Chinland Post | 2022 March 12 – Chin ramkulh, Falam peng, Rihkhawdar khua ah SAC ralkap sakhaan cu Chin National Defense Force (CNDF) nih an kah hna i SAC ralkap 3 an thi tiah CNO/CNDF rian ngeitu pakhat nih RFA ah a chim.
March 12 zing sml 6 hrawngah India-Myanmar ramri, Rihkhawdar khua No.2 sang ah a ummi SAC sakhaan cu CNDF nih an kah hna tiah theih a si.
“Zing sml 6 hrawng ah No.2 sang sakhaan an sak tharmi cu CNDF nih kan va kah. An mah lei in 3 an thi. Kan mah lei in hliamhma a pumi an um lo. An mah lei nih hriamngan in an kan lehrul ve”.
Kahdohnak hi sml 1 leng a rau i zing sml 7:00am hrawng ah CNDF cu hnu an kir ṭhan.
No.2 sang sakhaan hi March thla thok hrawngin ke kalmi battalion-268 thazang 30 hrawng an umnak sakhaan a si i No.1 sang ahcun a hlan tein umnak a khuarmi SAC sakhaan a rak um cia cang.
Cu hlan ah, CNDF nih Rihkhawdar No.2 sang ah a ummi sakhaan cu March 5 ah voikhat, March 7 ah voikhat an rak kah bal.
SAC ralkap le CNDF karlak kahdohnak ruang ah Rihkhawdar peng mipi 5,000 hrawng cu India le ramri hna ah an zaam tiah theih a si.
Ref: RFA
About The Author
