Falam peng, tibual khua kahdohnak ah SAC ralkap an thi mi an tam
The Chinland Post | 2022 November 21 – Chin ramkulh, Falam peng ah a um mi Tibual khua SAC ralkap sakhaan cu CNDF nih November 15 thok in sakhaan lak ding in an kah i November 20 tiang nifatin in kahdohnak a fak i SAC ralkap a thi mi zong an tam.
November 19 ah SAC nih raltuknak Helicopter in eidin le hriam a rak chanh hna i ralkap thazang zong a chap tiah CNDF/CNO nih a thanh.
November 19 kahdohnak ah CNDF Sniper nih SAC ralkap 2 a thah hna i kuan 200 leng an lak khawh, SAC nih vanlei in kah a bawmh ko hna nain CNDF hriamtlai pawl an him tiah an thanh.
Sakhaan kah hram an rak thok ni in SAC nih vanlei in kah a bawmh hna, minung, hriam le eidin a bawmh lengmang hna caah sakhaan lak ding hi a har ngai tiah CNDF Commander in Chief Salai Peter nih People’s Spring ah a chim.
Cu sakhaan ah Captain pakhat nih a hruai mi SAC ralkap 30 leng hrawng lawng an um tiah theih a si.
Sakhaan hmete a la kho ding thazang le hriam ṭha tein kan i timhtuah leng ah vawlei lei bawmhnak zong phih piak ding in kan i zuam ko nain SAC nih vanlei thazang tampi a hman ruang le hriam le kuan nih a kan zat lo ruang ah sakhaan kan la kho lo tiah CNDF Commander in Chief nih a chim.
Tibual khua SAC ralkap sakhaan cu hriamngan, hriamhme, Drone hna hmang in an doh hna i kahdohnak zarhkhat chung ah Drone in voi 300 leng bom kan thlak hnawh hna tiah CNDF/CNO nih a thanh. Drone in bom an thlak hna ruang ah sakhaan chung inn pawl a rawk mi zong hmanthlak in an langhter.
About The Author
