FDA Nih Eidin Dawr Zuarmi Chekfelnak An Tuah I Nithla Luan Cang Mi A Tam Tiah An Chim

Salai CungCung|2020 January 26| Chin ramkulh chung ah ei ding dawr pawl FDA (Food & Drugs Association) nih chekfelnak an tuah hna i nithla, kum cang luan cang mi eidin pawl an tam tuk tiah FDA tuanvo ngeitu Dr.Joseph Van Bawi Uk sin in kan theih.

“Dawr kip ah chekfelnak kan tuah i tam deuh kan hmuh mi cu nithla a luan cang mi a tam. Dawr 10 kan chekfel mi chung ah dawr 7 hrawng ah an um. Dawr kip kan kal tik ah nithla tha tein zoh hna uh tiah kan chim hna. Asinain tu ni tiang nithla a luan cang mi kan hmuh than peng. Dawr thil an cah mi hna zong nih nithla luan deng cang mi hna an phorh khawh men, cucaah dawr ngeitu pumpak zong nih tha tein an zohfel awk a si ve” tiah Dr. Joseph nih a chim.

Hakha ah dawr zuammi Lwin Lwin Oo nih “FDA nih dawr thil chekfelnak an rak tuah peng hi thil tha tuk a si. A ruang cu ei awk thlak lo mi hna cu zuar awk a tha lo. An mah nih chek an phlih mi hmanh kan chek ter hna” tiah a chim chap.

Hi bantuk in dawr kip chekfelnak an tuah hi Hakha ah thlahnih voikhat, pengkomh zung umnak Falam le Mindat ah thlakhat voikhat, ramkulh zapi khua kip ah kum khat ah voikhat tiin chekfelnak an tuah peng tiah kan theih. Ref.CW