February 1 ah “Silent Strike”: “Na tel ahcun na ngeihmi kan in chuh dih lai”
"Dai tein Um" (Silent Strike) in Hakha ah duhlonak an langhter lio - 2021 December 10 (Photo: Lakchinmi)
2022 January 27: Kawlram pumpi in February 1 ah tuah timh mi “Dai tein um (Silent Strike)” duhlo-langhternak nan tuah ve ahcun phungning nan ngeih mi vialte kan in chuh dih hna lai tiah Ralkap hnuzul phu nih catlap phawtnak le tlangaunak cu January 27 ah Hakha khua chung ah an tuah.
Hakha lawng ah silo in, khualipi tampi ah Hakha bantukin thanhnak an tuah.
A hlei in tlerhnak an tuahmi cu, Dai tein um ah na tel ahcun ralhrang dohnak phung “counter terrorism law” rampi leirawi timi cherchanh in thongthlak, a silo ah pehtlainak phung “telecommunication law” in thongthlak le a dangdang tulio phung ning in thilri le ngaihchiah vialte chuh dih nan si lai tiah an thanh.
Asinain, atulio ah daite in um, lamzawh tbk. a hruaitu upa hna nih kan tuah hrimhrim lai. Kan khualipi cu kanmah nih kan uk, ralkap nih an uk lo. Kan duhning in kan um lai tiah an chim. Phun dang in chim ahcun, Ralkap nih an kan uk kho hrimhrim lo timi langhternak a si tiah an ti.
Cun, atutan hi 2021 in duhlonak langhter in Dai tein um (Silent Strike) hi a voi 3nk a si lai. A voikhatnak cu, kan hnu kum March 24 ah siseh, December 10 ah siseh mizapi nih lengchuah lo dawr on lo le zeihmanh tuahlo in “Silent Strike” cu rak tuah a si cang.
Hi bantukin Ralkap duhlonak langhter an kham cuahmah lio ah, anmah Ralkap duhtu phu USDP party nih hruainak in Yangon khualipi Sule ah minung 200 tluk nih, February 1 thengte ah Ralkap duhnak langhternak in lamzawhnak an ngei hnik tiah theih a si. #
About The Author
