February Ah Tuah Dingmi Australia Hluttaw Ah Chinram Kong Ka Chimphuan Lai; Senator Dean Smith

0

City Hunter| 2018 January 28| Australia ram senator (hluttaw) lakah a hmasa bik Chinram a rak tlawngmi Senator Dean Smith nih nili chung Chinram a caam chung ah a hmuhtonmi vialte cu a ralaimi February thla chung ah tuah timhmi Australia Hluttaw ah chimphuannak ngeih a timh tiah kan theih.

Hi kong he pehtlai in Chinram a tlawn lio, January 26 chun, The Chinland Post zung ah Hakha hrambunh Chin media hna he tonbiaruahnak ngeih lio ah atu bantuk in Senator Dean Smith nih a chim.

“Tutan ah Chief Minister telh in Chinram cozah bu le hluttaw Speaker he tonbiaruahnak kan ngeihmi ah siseh, Hakha khuanu, khuapa le a dangdang zatlang mibu le ramkhel, biaknak upa hna he kan i tonnak ah hin a biapi in Chinram thanchonak ding Cinthlaknak kong a si. Senator (MP) pakhat ka sinak he keimah mit le hna hrimhrim in Chinram sining le dirhmun ka hmuhtonmi vialte hi kaa lunghmuih tuk. Chinram thanchonak ding caah ruahchannak tampi ka ngei. Tutan ka hmuhtonmi vialte hi February thla ah tuah dingmi Australia ram hluttaw meeting ah chimphuannak ka tuah lai. Keimah mit le hna hrimhirm in ka hmuhtonmi a si caah Australia ram hluttaw le cozah nih an zoh sawhsawh hrim lai lo. Chinram thanchonak caah pakhat khat cu a tuah hrimhrim ko lai ti ruahchannak nganpi ka ngei” tiah Senator Dean Smith nih a chim.

Tutan Senator Dean Smith Chinram a rak tlawn lio ah Chief Minister telh in Chinram cozah bu, hluttaw speaker Pu Zo Bawi, Hakha khuanu, khuapa, Chin zatlang bu, CNF, biaknak lei hruaitu upa, CCU riantuantu le siangngakchia, Hope Blood Donor Organization founder Pu Cung Hu, ramkhel party le MP a tuan liomi palai pawl he ton biaruahnak an ngei kho. Cun, Hakha sii-innpi, Hakhathar, Hakha Khuahlun a rawkralmi, HBA tualrawn velchum, Ralkap Tidil a rawkralmi, Khuacuanhnak tlang, Hlawhtling thlacamnak tlang, Solomon Van Hre inn, Thantlang CNF zung le Tikir Dam tibantuk hmun ah vehvatnak le tlonlennak a va ngei kho tiah TCP nih kan theih.

The Chinland Post zung i Chin media hna he tonbiaruahnak kan ngeih hi Chin ram a rak tlawn ah a donghnak bik biachim a ngeih a si. Hi lio ah Chin media dirhmun, hmailei riantuan timhmi, Chin media nih zuamcawhnak a tonmi, Chin media nih Chinram cozah zung le Chinram hluttaw ah zalongte in thawnglaknak nawl an ngeih lonak kong tibantuk kha Chin media zapi aiawh in The Chinland Post Chief Editor Salai Holy Tawk Tling Thang nih chimrelnak a ngeih.

Senator Dean Smith hi Australia ram ah senator (MP) 76 an um, cu lakah senator pakhat a si. Kawlram hi voili 4 a phan bal cang. Asinain Chinram cu tutan a rat hi a voikhat phanhnak a si. Australia ram in cozah le senator vialte lakah a hmasa bik Chinram a rak tlawngmi a si. Hakha lawng hmanh si lo in Thantlang peng VP Henry Van Thio chuahkehnak Tikir khua tiang a va phan khomi Australia senator pakhat a si.

January 23 ah Hakha a phan i January 26 zan tiang a caam hnu January 27 ah Kalay ah a kir than. Tutan Senator Dean Smith khuallam cu Australia ram ah khua a sami Australia Chin Federation Vice Chairman le Chin Charity in Chairman a tuan liomi Pu Renny Ceu Lian nih a rak zulh. +++

About The Author

Na ruahning rak langhter ve.. (Leave a comment)

%d bloggers like this: