February Thla Chung Ah SAC Ralkap Kut In Nu 15 An Thi, 35 An Tlaih Hna
The Chinland Post | 2023 March 8 — A luancia February thla chung, Myanmar ram pumpi ah SAC ralkap kah mi hriamngan, mei in khanghnak le khuate hna ah lut in meithal an puah ruang ah nu 15 an thi i 35 an tlaih hna tiah Burmese Women’s Union nih a thanh.
Nu 8 hi SAC ralkap nih khuate lei ah an kah mi hriamngan ruang ah an nunnak a liam i nu 3 hi a nung in an khangh hna tiah cathanh ah an langhter.
Cun February thla chung ah nu an tlaih mi hna a karh khun tiah an thanh.
Thlakhat chung ah an tlaih mi hna nu 35 hi Taninthary ramṭhen, Naypyitaw, Mandalay ramṭhen, Yangon ramṭhen, Sagaing ramṭhen, Mon ram, Bago ramṭhen le Shan ram hna in an si i Mandalay ramṭhen ah 13 an tlaih hna tiah theih a si.
Hramhram uknak caan chung ah tlaih a tong mi nu hna cu thong chung ah ngandamnak lei ṭha tein zohpiak an si lo, biahalnak ah hramhram in hrem an tong, nupa sualnak he aa pehtlai mi an tuahpi hna i an tlerh hna tiah theih a si.
Hramhram in uknak lak a si ni thawk in February 25 tiang SAC ralkap nih phungning lo nu 3,000 leng a tlaih cang hna i cu chung ah nu 570 cu sual an phawt an si cang tiah Burmese Women’s Union sin in theih a si.
Cun hramhram uknak caan chung ah nu 420 leng an nunnak a liam cang tiah theih a si.
