Federal Kan Ngah Hlan Lo Kan Hal Zungzal Hna Lai; Dr. Salai Lian Hmung Sakhong
City Hunter| 2018 June 29 | Tlangcung miphun nih a hrampi suttung a simi democracy, miphun tlukruannak le mahte khuakhan lairelnak khawhnak (federal) fekte i tlaih in kan ngah hlan lo kan hal zungzal hna lai tiah Dr. Salai Lian Hmung Sakhong nih a chim.
“Hi a hrampi suttung hna cu kan ram ramkomh chung ah a ummi tlangcung miphun hna caah um lo awk a tha lomi suttung an si caah kum 50 rau cang hmanhseh law nihin tiang hi suttung pawl kanmah nih kan hal peng rih ko hna. Hi ruang ah kanmah leikap in cun hi suttung pawl kan ngah hlan lo pehzulh in kan hal rih ko hna lai” tiah Tlangcung Miphun Phu in ramkomh remdaih ceihmainak bawmchantu committee timi UPDJC Vice Chairman Dr. Salai Lian Hmung Sakhong nih a chim.
Naypyidaw i Miphun Tunmernak le remdaihnak central zung (NRPC) ah June 29 ah tuahmi avoi 15nak UPDJC tonpumh thawknak biacah a ngeih lio ah atu bantuk in a chim hi a si.
Tlangcung miphun nih an halmi a hrampi suttung pathum ah aa telmi federal kongkau cun gah cozah, ralkap le tlangcung hriamtlai phu hna kar ah ceihmainak an ngei ko nain i hngalhthiamnak le hnatlaknak an ngei kho rih lo.
Cu ruang ah July 11 ah tuah dingmi avoi 3nak kumzabu 21 panglong conference ah hi suttung pathum kong lanhtak in a dang kong tu an ceih te lai.
Rampi Ruahnak Petu zung in General Director U Zaw Htay nih a luancia avoi 2nak lio tonpumhnak ah a rak buai ngaimi tlukruannak, federal kongkau le ramkomh bu in chuah le chuahlo kong pawl tutan conference ah cun ceihmai lo in kumzabu 21 panglong conference a dih hnu lawng ah pehzulh ceihmai ding in hnatlaknak ngeih a si tiah June 25 ahkhan media sin ah a chim.
“Kanmah leikap in cun hi ramkomh chung in chuahnak nawl hi kan halmi a si lo. Ramkomh bu in chuahnak kong hi zei bantuk hmun le caan hmanh ah kanmah tlangcung miphun hna nih kan rak hal bal lo” tiah Dr. Salai Lian Hmung Sakhong nih a chim.
Avoi 3nak kumzabu 21 panglong conference ah ramkhel, humhimnak, sipuazi, loram hmun le zatlang nun tibantuk suttung 5 ceihmai ding in hnatlaknak ngeihcia a si cang.
Cozah phu in UPDJC Vice Chairman Dr. Tin Myo Win nih, “Rampi caah a biapimi federal policy chiah khawhnak ding ah kapkhat le kapkhat thinlung thumhnak tuah i hnatlaknak pawl ngahnak ding le ramkhel buainak hri phoih khawhnak ding zapi in i bawmh cio ding kaan sawm hna” tiah a chim.
Atu ah TNLA, AA le Kokant (MNDAA) cu avoi 3nak kumzabu 21 panglong conference kai khawhnak ding ah sawm ding ah cozah le ralkap an i ceihmai rih lai tiah Rampi Ruahnak Petu zung in General Director U Zaw Htay nih a chim.
Kumzabu 21 panglong conference cu ni nga chung an rak tuah tawn nain tutan cu ni li lawng tuah ding in an timhtuah tiah UPDJC tonpumhnak in theih a si.
Ref: Mizzima News
