Federal rampi kong SAC he theihthiamnak kan ngei tiah KNU/KNLA (PA) nih a chim
The Chinland Post | 2022 May 30 – Ramkhel lei phu vialte teltumnak a ummi hnatlaknak kha charhchan in Federal Democracy rampi sersiamnak kong SAC he theihthiamnak kan ngei tiah Karen National Union KNU/KNLA (PC) biachimnak nawl a ngeitu Colonel Saw Kyaw Ngunt nih Mizzima ah a chim.
“Kan duhmi daihnak kan ti lai maw a siloah zungzal daihnak kong a si ahcun kan ram hi Federal Democracy ram kan ser a hau. Cuti kan ser tikah ramkhel lei pehtlaihnak a ngeimi phu vialte aa telmi hnatlaknak kha charhchan in ser a hau. Ca in a si lo nain theihthiamnak kan ngei tiah a chim.
Naypyitaw ah May 26-28 tiang nithum chung tuah a simi SAC he biaruahnak a dih hnu in kahdaih biaruahnak thokding, Federal ram serding le cuti ser i timh tikah zapi telmi biaruahnak le hnatlaknak charhchan in serding tiah biaruahnak cu SAC, kahdaih phu le hruaitu karlak ah theihthiamnak a um tiah a chim.
KNU/KNLA (PC) cu May 26 ah SAC hruaitu he an i tong i May 27-28 ah SAC kahdaihnak phu he tonnak an ngei. Tonnak ah KNU/KNLA (PC) chairman Saw Htaw Lay, Deputy Chairman Dr. Naw Ka Paw Htoo le Central Committee chungtel Saw Maung Maung hna an kai.
Tonnak ah kahdaihnak le ṭhanchonak kong he pehtlai in bia an i ruahmi chungin hnatlaknak ngeihmi tete kha minthut a si tiah SAC thawngthanhnak nih a thanh.
Minthutnak an ngeihmi kong he pehtlai in thil sinning a dikthlir cu SAC le KNU (PC) kaphnih nih fiang tein an thanh lo.
SAC nih kahdaih biaruahnak ngeiding in sawmnak a cohlangmi he ton an si cang i phu thum nih an ton cang.
Tonnak ah daihnak le ram sersiamnak kong tiah chim a si ko nain kahdaihnak le ram pumpi in a cang cuahmahmi buainak he pehtlai in ṭha tein ceihmaimi a um rih lo.
SAC nih biaruahnak cu May 20 thok in Naypyitaw ah hlunghlai tak in a tuah ko nain ram pumpi ah kahdohnak le SAC nih mei khanghpiaknak cu a um peng rih ko.
Ref: Mizzima
About The Author
