Fitlaw Thu Htoo San; Zungmawi Rian Kum 18 Chung Ah Ka Tuan Tluk In Ka Ngah Lo
City Hunter| 2018 June 7| Baisakup muicawl thatha rumro ngei ngai le zohco ngai in lemcang a tuah khotu Kawlram lemcang thiam fitlaw Thu Htoo San cu zungmawi lei cawlcanghnak lei ah hmuhlonak a sau ngai cang. Sihmanhsehlaw, a rauh hlan ah baisakup zung ah hmuhsak dingmi “Hmaw-win-ta-man-gyar (မှော်ဝင်သမန်းကျား)” baisakup muicawl tu ahcun Thu Htoo San cu fitlaw (actor) dirhmun in lemcang a tuah/tuan.
“Hmaw-win-ta-man-gyar (မှော်ဝင်သမန်းကျား)” muicawl ah aa telmi Thu Htoo San nih hi muicawl he pehtlai in Irrawaddy ah atu bantuk in a chim.
“Hmaw-win-ta-man-gyar (မှော်ဝင်သမန်းကျား)” baisakup muicawl zung ah hmuhsaknak kan tuah cang lai an ti. Hi muicawl ah philh lo awk a tha lomi a tampi. Cakei adik he kaa thlak tikah ka philh kho lo. Hi muicawl cu zaran thlak tawnmi muicawl bantuk a si lo, khuaruahhar taktak in nan hmuh lai. Cakei a dik zong nan hmuh lai. Hi muicawl cu dirhmun pakhat tiang cu a hlawhtling ko lai” tiah Thu Htoo San nih a chim.
Lemcangthiam Thu Htoo San nih, “Hmaw-win-ta-man-gyar (မှော်ဝင်သမန်းကျား)” muicawl ah cakei adikmi pawl he kaa thlak caah harnak tampi ka ngei, nain hi muicawl phun cu keimah hrimhrim nih ka uar caah kaa thim i kaa thlakmi a si tiah a chim.
Tu lio zungmawi cawlcanghnak he pehtlai zong in Thu Htoo San nih, “Hi karlak ah muicawl kaa thla ti lo. Kaa thlak lo caan chung ah pumpululh ka chuih. Mandalay i dum chung ah ka um. August thla ah baisakup muicawl thlak ding ka ngei. Hmuh lengmang hna he cun an si lai lo. Khuazeika hmun i ka um paoh ah fitlaw ka si lo. Muicawl kalning a that ahcun kaa thla. Zungmawi rian ka tuannak kum 18 a tling cang. Zungmawi rian ka tuan tluk le muicawl kaa thlak tluk in ka ngah lo. Sihmanhsehlaw, kaa lungsi ko ti khawh zong a si i kaa lungsi lo ti khawh zong a si. Atu ka sining nunnak (life) te hi a tlamtlinnak ding in ka tuahtuan ko” tiah a chim.
Thu Htoo San cu duhnak kong he pehtlai in an hal tikah a rau lai lo ti lawng a leh hna i zeiruang ah timi cu pehtlai in a let ti hna lo. Zungmawi lei pehtlai in cun a rauh hlan ah Thu Htoo San i baisakup muicawl pawl zoh khawh an si cang lai.
Ref: Irrawaddy
