Freedom of Edinburgh Laksawng Cu Pi Suu Kyi Sin In An Chuh Than
TCP-Online| 2018 August 24| Ramkomh ruahnak petu Aung San Suu Kyi cu British ram, Scotland ram i Edinburgh khua nih an rak pekmi Freedom of Edinburgh cu an chuh than.
Edinburgh khua council upa Lord Provost Frank Ross nih biatung a chuahpi i council member hna nih mee zuhnak in biakhiahnak an tuah tikah Pi Suu Kyi nih a co ciami laksawng cu chuh than dingin an bia an fehter. Mah laksawng cu 2005 kum lio Pi Suu Kyi inn thong a rak um lioah an rak pekmi laksawng a si.
Hi laksawng a chuhnak a ruang bik cu Kawlram Rakhine ram ah cozah nih hramhram in rian an tuan mi duhlonak langhternak ca i an chuhmi a si.
Laksawng chuh than dingin biatung a dirhtu Lord Provost Frank Ross nih “Mah laksawng kan rak pekmi hi kan zoh than tikah aa tlak in kan hmu ti lo. 2005 kum lio kan rak pekmi laksawng hi fawite in bia kan khiahmi zong a si lo” tiah a chim.
Edinburg khua nih an chuhpiak hlan ah hin Dublin, Newcastle le Oxford khua hna zong in Pi Suu Kyi nih rak co ciami laksawng hi an rak chuh cang. Edinburgh khua nih tubantuk laksawng pek ciami an chuh than hi kum 128 hnu ah a voi hnihnak a si. A voi khatnak an rak chuhmi cu Charles Parnell a si i chungkhar lei kong zohdawh lo a rak um caah an rak chuhmi a si.
Tubantuk in Pi Suu Kyi laksawng an chuh thanmi kong he pehtlai in ramkomh cozah le NLD Party lei nih cun zeihmanh lehnak an um rih lo.
Ref: VOA
About The Author
