Furpi Hakha Khuachung Zunput A Sahmi An Um Caah Fakpiin Dantat An Timh Hna
Salai Cung Cung |2018 August 15| Chin ramkulh khuapi a si mi Hakha khuachung furpi caan ah zunput a sahmi an um caah tuanvo ngeitu hna nih fakpi in dantak an timh hna tiah kan theih.
Abik in furpi caan i zunput (ek-inn) a sahmi an um i a thu/nam caah a tubantuk in dantat an timh hna.
“Hakha khuachung, ruah tam deuh caan paoh ah zunput sah an hmang i lam kal pah in a rim a nam tuk. Mipi caah a tha bak lo. Zarhpi ni pumhkar lak hna ah a sahmi zong an um. Hi kong ah kan hnu lei ah khan ca zong kan chuah cang, ho nih dah zunput hi a sah nan theih hna ahcun fak pi in dan kan tat cang hna lai tiah ca zong kan chuah cang. Hi kong cu sipin nih an tawlrel lai i Upadi ning in dantat zong an si lai” tiah Chin ramkulh lam le sul vuanci Pu Sui Thio nih TCP ah a chim
“Ek hlawnhnak motor zong a rauh hlanah cawk i sipin nih ek hlawnhnak an tuah mi ah hlawnh khawh a si te lai. Minung tampi umnak zung hmanh kum saupi a nguh hna. Inn chungkhar minung 10 tluk umnak ek-khur tham cu tha tein tuah i an mah le inn ek cio cu tha tein an tawlrel awk a si, tiah Pu Sui Thio nih cun a chim chap.
Hi kongah Hakha cu khua lipi pakhat a si cang bantuk in sipin nih ek hlawnhnak khur (septic tank) zong Haithlan thlang ah pe 70 x 14 ngan le sang in an tuah cang tiah theih a si.+++
About The Author
1 thought on “Furpi Hakha Khuachung Zunput A Sahmi An Um Caah Fakpiin Dantat An Timh Hna”