Gangaw peng ah SAC ralkap 3 an kahthah hna

The Chinland Post | 2022 September 1 – Magway ramṭhen, Gangaw peng, Myittharsi pura umnak in EPC zung lei ah mi a ngiami SAC ralkap 3 cu August 29 zinglei sml 10:00am hrawngah CDF- KKG phufonh nih an kahthah hna tiah theih a si.

Hriam tling te he mipi thuam aa hrukmi SAC ralkap 3 cu EPC zung chungah cycle pahnih in an i chawh lioah zung luhnak hmai ah an kahthah hna i hriam an va lak lioah bawmtu mawṭaw a rat ruangah him tein an kir ṭhan tiah CDF-KKG nih a thanh.

Kahthahnak hi Myittharsi pawng kahdohnak i a nunnak a thapmi CDF-KKG hriamtlai hna caah lehrulhnak kan tuahmi a si tiah an cathanh ah an langhter.

SAC ralkap nih May 26 thok in Gangaw peng ah kahdohnak an tuah i Gangaw PDF pawl an umnak Myitthar ti dil pawng cu vawlei le vanlei he fak tuk in an kah hna caah mipi hriamtlai 7 an nunnak a rak liam.

June 19 ah Myitthar ti dil in a rak chuakmi SAC ralkap cu PDF-Gangaw phufonh nih an rak kah hna bantuk in June 18 zongah SAC ralkap pawl cu PDF-Gangaw 701 battalion (YRPA) nih bom an rak puah hnawh hna i SAC ralkap 5 an rak thi.

Tutan August 29 kahdohnak hi CDF-KKG battalion 5, YDF battalion 14, Ṭilin PDF phufonh hna nih nihnih chung an bawh hna hnuah an kahthah mi hna a si tiah CDF-KKG nih a thanh.

Na ruahning rak langhter ve.. (Leave a comment)

%d bloggers like this: