Gangaw peng ah SAC ralkap le YDF karlak ah ni 4 chung kahdohnak a chuak, SAC nih thazang a za leng in a hman
The Chinland Post | 2022 June 11 – Gangaw peng ah SAC ralkap le Gangaw hmunhma hriamtlai hna karlak ah ni 4 chung kahdohnak a chuak tiah Yaw Defense Force (YDF) nih June 10 ah thawng a thanh.
Kahdohnak pawl hi June 6 ah voikhat, June 7 ah voikhat, June 8 ah voihnih, June 9 ah voikhat tiah pehzulh in a chuak i SAC ralkap a tlawmbik 5 an thi kho, a fiang in theih a si rih lo tiah an ṭial.
SAC ralkap pawl le YDF cu June 6 ah Pawlay khua lanṭhen pawngah sml cheu hrawng kahdohnak a chuak i SAC ralkap 2 an thi i 1 aa hliam tiah an langhter.
Cun, June 8 zongah SAC ralkap pawl cu Gangaw khua hnulei ah YDF he kahdohnak a chuah caah SAC ralkap 2 an thi.
June 8 chun sml 2:00pm hrawng ah Taungpin khua lei ah ralkap nih kahdohnak an tuah i YDF le CDF phufonh hna nih an kah hna. Cu kahdohnak in SAC ralkap a thimi zat a fiang in theih khawh a si rih lo tiah an langhter.
A cunglei langhtermi kahdohnak pawl ah SAC ralkap nih thazang a zaa leng a hman caah YDF chungtel 2 nih ram le miphun caah an nunnak an pek tiah YDF thawngthanhnak in theih a si.
About The Author
