Global Zophei Seminar le Zuamnak Phun (5) Modern Leitak ah An tuah Lai

0

The Chinland Post| 2019 April 15| Thantlang peng um Zophei tlang khua (23), Hakha-Thantlang um Zophei mizapi le ramleng um a bik in Zophei Family Network Of America (ZFA) hruainak le Zophei Youth Organization tawlrelpinak in Zophei ifuntomnak le thanchonak caah theihthiamnak cu kan thazaang timi tlangtar in Global Zophei Seminar cu a ralaimi May 9-12, 2019 kar Modern Leitak ah an tuah lai tiah theih a si.

Lam onhnak program cu Hakha, Zophei, Lautu, Mara i Lam committee nih tuanvo lak in May 7 khual phak le May 8 ah tuah a si lai.

Global Zophei Seminar hi May 9 Modern phak in May 10-12 tuah a si lai. Global Zophei Seminar i a muitinh (motto) cu theihthiamnak cu kan thazaang (understanding is our strength) ti a si i a tinhbikmi cu pakhatnak vawlei cung hmunkip a um mi Zophei tefa vialte itheihthiamnak le i hawikhawmhnak thanchoter ding, pahnihnak: Zophei pupa hna nih an rak ngeih mi lungput thar chuah than ding le a pathumnak cu Zophei u le nau hna chan he aa tlak in alamkip in thanchonak kong i ceihmai ding ah a si tiah ZPYO upa pakhat nih The Chinland Post ah a chim.

Global Zophei Seminar Cawnpiak tu hna cu; (1) Education kong ah USA, Australia, Europe, Myanmar lei in an Education System kong sharing tuah cio ding. (Exchange Knowledge of Education System) University ngakchia he tonnak voikhat ngeih ding, (2) Zophei kan pu pa hna lungput tha tharchuah thannak kong cu Pu Zapeng Sakhong nih cathluan chuahpi ding, (3) Ramkhel (Politic) kong ah Salai Za Ceu Lian nih cawnpiaknak ngeih ding le (4) chawleh chawhrawl (Business-Entrepreneurship ) kong ah Pu Ceu Hlei Lian nih cawnpiak a si lai tiah theih a si.

Hi Seminar chungah Zophei Idol zuamnak, Zophei Miss zuamnak, Nu/Pa volleyball zuamnak, Hlaremh zuamnak, Paih zuamnak tuah ding a si i Paih pakhatnak laksawng Ks. 1,000,000, pahnihnak Ks.300,000, pathumnak Ks.200,000 le a dang zuamnak paoh laksawng cu pakhatnak ah Ks.500,000, pahnihnak Ks. 300,000 le pathumnak ah Ks. 200,000 a si lai tiah theih a si.

Zophei Idol ah pakhatnak a ngahmi cu 2020 ZFA Conference ah sawm ding timhtuah a si lai tiah theih a si.

ZFA le ZPYO Concert zong May 17 zan 7 ah Hakha tuah timh a si i Kawlram hlasak minthang awtha Sung Tin Par, Jenevy Sui, Salai Pa Ling telh in Laimi awtha tampi an itel lai tiah theih asi.

Hi kong he pehtlai in Hakha um Zophei dihlak timhtuahnak le Zophei khuatlang kongah ceihhmainak le chimphuannak cu February 22, 2019 Hakha ah Zophei Youth Organization (ZPYO) hruainak in tuah a si i Col. Solomon Thang Ding (CNF Defense Minister) nih biachimnak a ngei. Zophei Khuakip zongah ZPYO nih tlawn in Puai tuahnak kong an chim phuan cuahmah lio a si. ZFA cu USA ah Zophei bu nganbik pakhat a si i Zophei thanchonak, zophei fimthiamnak le Zophei lungrualnak caah biatak tein a cawlcangh cuahmah mi bu a si. Zophei Youth Organization (ZPYO) (ahlan min- Zophei Christian Youth Fellowship) cu 2008 kum Zephai A ah rak dirhmi Zophei khua (23) le Hakha, Thantlang Zophei mino fonh in rak dirhmi a si.

ZPYO nih kan hmuitinh bikmi cu Zophei pumkhat sinak le hawikomhnak, lentecelhnak, Khuatlang dawhternak, khuatlang ah rithaisii dohnak, thingram pawngkam zohkhenhnak, ramsa le ti um ngacel kilvennak le chiatthat zohkhenhnak hna hi an si.

About The Author

Na ruahning rak langhter ve.. (Leave a comment)

%d bloggers like this: