Global Zophei Seminar Miss Winner Sui Tin Tlem He Tonbiaruahnak
Salai CungCung|2019 May 15| Avoi 1nak Global Zophei Seminar miss zuamnak ah Thantlang peng Hlamphei khuami Sui Tin Tlem nih pakhatnak (winner) a co. Hi Miss zuamnak ah minung 11 khua ai-awh in an i zuam kho. Pakhatnak Hlamphei, pahnihnak Khuabung, Pathumnak Leitak Zipi, Palinak Leitak Modern an si tiah kan theih.
“Pakhatnak ah tubantuk in pakhatnak ka ngah khawh hi Pathian sin ah kaa lawm. Cun a lamkip in thazaang a ka pe i a ka dawtu zapi cung ah le a tawlreltu cung ah lunglawmhnak tampi ka ngei. Miss lei hi cu ka zuam phun te a si nain puai ah voikhat hmanh kaa zuam bal lo, tu hi ka voikhatnak a si. Hi miss pakhatnak ka ngah cu ka lawm tuk, cun dawtu tampi zong ka ngei ti ka theih i ka lawm khun. Tutan an tuah mi hi a tha tuk ko nain hmailei ah cun hi nak tam deuh chin chin in tel khawh i zuam cio hna u sih law ramdang lei zong in kan unau tampi in rak tlung kho ve hna seh ti ka duh. Tubantuk in Global zophei seminar pi an tuahmi cung ah hin ka lawm tuk, hmailei ah a lamkip in kan Zophei mifa hna kan thancho chinnak le pakhat le pakhat kan i tlaihchan chinnak le kan lung aa rual chinnak a si” tiah Zophei Miss Winner ngahtu Sui Tin Tlem nih TCP ah a chim.
“Hmailei thangthar mino Miss zuam duhmi le aa zuam dingmi sin ah chim ka duhmi cu, Miss zuam tikah hin Mui dawh le pumrau that lawng in a za lo. A dang dang fimthiamnak zong kan ngeih chih a herh, cun ca tampi relchih ding, biachim holhrel zia thiam i zuam ding, theihhngalhnak kaupi ngeih a hau, fashion lei zong tampi i zuam ding, kan taksa le kan pungsan zong tuan tein lentecelhnak ngeihpiak ding, hmailei kan naule aa zuam dingmi nih mah pawl timhtuahnak ngeih bu tein um kho hna seh ti ka duhpiak hna” tiah a chim chap.
Hmailei ah kan ram le kan miphun kan Zophei caah ka si khawh tawk in kaa zuam zungzal lai. Ka riantuannak he pehtlai zong in ka si khawh tawk thazaang chuah kaa zuam lai. Ka dam ko le caan ka ngeih ko ah cun ramchung ramleng ah kan ram le miphun caah puai ah fashion siseh, zeidang dang a herh mi sawm mi paoh cu ka cohlan dih ko hna lai tiah Zophei Miss pakhatnak ngahtu Sui Tin Tlem nih a chim.
“Miss zuam lio ah a biapi bik in ka ruahmi cu, kan lam kal le kan umtu ning, kan biachim holh rel le tlangtlatu (judges) le mipi hna zeitluk in dah an thinlung kan lak khawh hna ti hi a si tiah ka ruah. Tutan Miss pakhatnak ka ngahmi a ruang cu, a pakhatnak ah Pathian thawng in si. Cun keimah ruahnak ah kei hi kaa zuam lio ah hmaipanh tein um khawh kaa zuam, lam kal zong tha tein ka cawn ve, cun i zuam hlan ah hin Zophei tuanbia tibantuk le a dang dang theihtlei tete zong tampi ka rel. Biachim holh relzia zong tha tein timhtuahnak ka ngeih caah pakhatnak ka ngah hi a si kho men” tiah a chim.
Voi 1nak Global Zophei Seminar Miss zuamnak pakhatnak a ngahtu Sui Tin Tlem cu a khua Hlamphei, sianginn kaimi Monywa Institute of Economic in BBA a dih. Unau pali lakah upabik a si. A nu Pi Thla Hniang, a pa Pu Ngun Kham a si. Hlamphei khuami Hakha khuasa an si. Tu lio a rian tuan lio mi cu Hakha Sii-man-king zung(Chin Planning Office),ah (DPO)Duh-Oo-Sii in a tuan lio mi a si tiah kan theih.
About The Author
