Gospel Singers Group nih Paletwa Ralzam Ca Hlasak Bawmhhalmi Sing 115 leng An Hmuh

Gospel Singer Group Paletwa Ralzam Ca Bawmhhal/Amai

Salai Josephbawi| TCP-Hakha| 2020 August 21| Hakha le Thantlang um Hlasak thiam minthang kan ngeihmi hna Gospel Singers Group hohatnak in Paletwa ralzam bawmhnak caah Hakha le Matupi hlasakmi chungin Ks. 9,012,200/- an hmuh I Paletwa ralzam hna kut cungah an pek chanh cang hna, August 19 ah Thantlang khuachung hlasaknak in bawmhhalnak an ngei than I Ks.2,550,200 azapi sing 11,562,400 an hmuh tiah thawng kan theih. Hi hlasaknak hi July 31-August 1, 2020 chung Hakha lamtonnak kip ah siseh, August 4 ah Matupi khuachungah hlasatu minung 20 leng kal in siseh, August 19 ah Thantlang ah hlasaknak in bawmhhalnak an tuah hi a si.

Hi kong he pehtlai in Paletwa ralzam bawmhnak hlasaknak caah Gospel Singer Group hruaitu Ptr. Bawi Hlei Thang nih “Facebook chan a si tikah har a  tongmi hna nu le ngakchia hna an tah an ainak kan hmuh tikah kan lung a fak, kan ngaih achia. Hi bantuk caan ah kan bawm hna lo ahcun aho nih an bawm hna lai timi ruahnak he hi program hi kan thokmi a si. Pathian nih aw-zai a kan pekmi pahrang hmangin bawmh a hal khomi kan si hi kan ilunghmuih khunnak a si. Nu le pa nih dawt cio vemi mino lawngte kan si tikah kan unau hawi ca tiin ruahsur nilin lak ah mi kutdawh in bawmh kan hal i a fawimi cu a si hrim lo. Cheukhat cu a theithiam lomi zong an um tikah.  Online in a kan soiseltu zong an um len ko. Asinain kan tha a chia hrim lo. Kutsamhtu le pechanhtu nan dihlak cungah kan I lawm” tiah a chim.

“Kanmah cu a hmun tiang kan va phan kho rih lo nain an thil sining kan theih dihmi a si. Kanmah cu mitku Thawte kan it kan um kho nain kan unau Paletwa um hna cu mitku vuai lo le zeitik ral nih a kan den lai ti phan ah ingilh khawhlo le thinphang in a ummi an si. Eidin, hnipuan le khuasaknak ah herhbau peng an si. Paletwa ralzam tawlreltu U Zar Ni nih a kan chimhnak ah Facang achiabik Ks.60,000, Pawsan a tha deuhmi singkhat leng lawngte an si ati. Ramchung ramleng lei nih kutsamh bawmchan cio rih ko hna usih. September thla ah an sin tiang phak khawh izuam kan tim fawn. Pathian rian a tuanmi unau lawngte kan si. Kut a samhmi unau, kan cawlcanghnak ah bawmchantu nan zapi cung zongah lunglawmhnak tampi ka ngei.” Tiah a biapeh ah a chim.

“Ral ruangah nu le ngakchia, chungkhar lungretheih vansan in a ummi hna caah Pathian nih a kan pekmi thiamnak hmangin bawmhhalnak kan tuah ve hi a si. Miphun dawtu lei in an hlutmi sing 90 leng cu Paletwa ralzam tawlreltu a simi hna U Zar Ni, U Min Htin le Pyi Lee hna sin ah Matupi an rak ra I pekchanhnak kan ngei kho hna. Furpi a si cang caah eidin lei an har chinchin ti kan theih caah August 19 Thantlang hlasaknak in bawmhhalnak kan peh hi asi” tiah hla a savemi Biak Men Sung@Amai nih The Chinland Post ah a chim.

“ Tutan Paletwa ralzam unau hna caah bawmhhalnak kan tuahmi hi kan tuah kan ton ballomi bawmhhal cawlcanghnak a si tikah COVID-19 runvennak kong in siseh, Ralzam unau hna caah bawmh kan halmi theihthiam lo le zeirello in a kan zaihnawhmi zong an um len. A sina tein miphun hawi hna caah bawmchan a duhmi kan tampi ti kan theih I nilin ruahsur lak ah kanmah zong lungtullo tein kan izuam. Thapek izuam rih ko hna usih” tiah a biapeh ah a chim.

Hakha hlasak bawmhhalnak tuah lio ah hlasa minung (40) fai an itel lengah zanghlei cawi in Matupi bawmhhalnak August 3, 2020 ah Singers in Deborah Sung Mi, Nun Duh Dim, Hannah Van Hnem Par, Mang Hlei Tial, Zion Par, Biak Men Sung@Amai, Rachel, Bawi Tha Chin, Van Hlawn Dim, Biak Tha Sui, Aa Zi Sung, Ngun Tin Tial, Lal Tha Chin Sang, Dawt Tha Hniang, Ptr.Bawi Hlei Thang, Uk Hlei Sang, Bawi Ceu Thang, Nawl Tling Lian, Nau Tuan le The Hakha Post media in KB Thawng, Driver in Lianpi le Sakte hna an kal tiah kan theih.

Gospel Singers Group cu Pathian bia le hla in crusade le camping tuah in Khrihfami ca riantuannak, harnak a tongmi, aharsami le pum tlamtlinglomi hna bawmchanding timi tinhnak he Hakha le Thantlang um Pathian hla a sami (Gospel Singers) minung 60 leng nih 2020 July 22 Hakha ah dirhmi a si. 2015 kum in Arakan Army (AA) le Kawl Cozah ralkap kahdohnak ruangin Paletwa peng hmunkip ah ralzam thongli fai an um i eidin, hnipuan khuasaknak inn le lo kongah harnak an tong ngaingai tiah theih a si.

 

 

 

Na ruahning rak langhter ve.. (Leave a comment)

%d bloggers like this: